Presidenti i Getafes, Angel Torres, ka konfirmuar se klubi është në bisedime me Jadon Sanchon dhe nuk e ka përjashtuar mundësinë e transferimit të mesfushorit Dani Parejo.
Në një prononcim për “Movistar Plus”, Torres bëri të ditur se java e ardhshme do të jetë vendimtare për të kuptuar nëse Getafe do të arrijë marrëveshje me njërin apo të dy futbollistët.
“Ne nuk kemi arritur ta plotësojmë boshllëkun e krijuar nga lëndimi i Uches. Po flasim me Sanchon, ashtu siç kemi bërë edhe tre ose katër muaj më parë. Parejo mund të jetë gjithashtu një tjetër mundësi”, deklaroi Torres.
Ai shtoi se gjatë javës së ardhshme do të bëhet e qartë nëse negociatat do të përfundojnë me sukses.
Getafe tashmë ka siguruar transferimin dhe regjistrimin e Dani Carvajalit, ndërsa synon të përforcohet edhe me dy emrat e tjerë. Megjithatë, pengesa kryesore mbetet gjendja financiare e klubit dhe kufizimet e faturës së pagave, veçanërisht në rastin e Sanchos, i cili pritet të ketë kosto më të lartë se Parejo.
Për shkak të moshës së tij, Parejo mund të jetë një alternativë më e përballueshme financiarisht. Ndërkohë, presidenti Torres mund të duhet të angazhohet personalisht për të bërë të mundur realizimin e këtyre transferimeve.
Trajneri José Bordalás do të preferonte afrimin e Sanchos, pasi beson se skuadra ka nevojë për një lojtar krahu që mund të sjellë më shumë alternativa në fazën sulmuese. Megjithatë, kostoja e transferimit të anglezit mbetet një pengesë e rëndësishme.
Java e ardhshme pritet të jetë vendimtare për planet e Getafes në afatin kalimtar. /Kampionet/
