Real Madridi kishte vendosur në dispozicion për largim Eduardo Camavingan gjatë afatit kalimtar të verës, madje klubi spanjoll ishte i gatshëm ta shiste për një ofertë prej 50 milionë eurosh.
Në fillim të afatit kalimtar, drejtuesit e Real Madridit u kishin bërë të ditur disa lojtarëve se mund të largoheshin nëse do të vinte një ofertë e mirë. Njëri prej tyre ishte Camavinga, pasi klubi po e monitoronte tregun e mesfushorëve dhe synonte të sillte një tjetër përforcim në atë repart.
Në rast se do të realizohej një transferim i ri, mesfushori francez ishte konsideruar si lojtari i gatshëm për të liruar një vend në skuadër.
Camavinga kishte qenë në qendër të kritikave në disa raste gjatë sezonit të kaluar. Një prej momenteve më të këqija ishte përjashtimi i tij në ndeshjen e kthimit të çerekfinales së Ligës së Kampionëve ndaj Bayern Munichut, ku mori kartonin e dytë të verdhë pas një ndërhyrjeje të pamatur.
Për më tepër, në klub ekzistonte edhe bindja se 23-vjeçari nuk po arrinte të bënte përparimin e pritur në lojën e tij.
Real Madridi kishte shpenzuar shuma të konsiderueshme dhe synonte të investonte edhe më shumë në përforcime, ndaj një shitje e Camavingas do t’i siguronte klubit të ardhura të rëndësishme.
Por një ofertë konkrete erdhi nga Turqia. Sipas Matteo Morettos, i cili raportoi në Radio Marca, Galatasaray kishte kontaktuar Real Madridin në korrik për të diskutuar transferimin e Camavingas.
Klubi turk ishte i gatshëm të ofronte 50 milionë euro për mesfushorin francez, shumë që do ta kishte bindur Real Madridin për ta pranuar marrëveshjen.
Megjithatë, gjithçka u bllokua nga dëshira e vetë lojtarit. Camavinga nuk dëshironte të largohej nga Real Madridi dhe synimi i tij ishte të fitonte një rol më të rëndësishëm në skuadër dhe të siguronte vendin e tij në formacionin e Jose Mourinhos.
Për momentin, vendimi i tij duket se po shpërblehet, pasi rëndësia e francezit në planet e Mourinhos është rritur ndjeshëm në fillim të këtij sezoni.
Camavinga ka qenë një lojtar i rëndësishëm për trajnerin portugez, edhe pse mbetet për t’u parë nëse do ta ruajë këtë status pasi Aurelien Tchouameni, i cili konsiderohet titullar në atë pozitë, është rikuperuar dhe është tashmë i gatshëm për të luajtur./Kampionet/
