Diaspora vazhdon të ketë një rol të rëndësishëm në formimin e Kombëtares së Kosovës, gjë që vërehet edhe në listën e fundit të përzgjedhësit Franco Foda për ndeshjet e Ligës së Kombeve.
Nga 27 futbollistët e grumbulluar për ndeshjet e këtij cikli, 12 prej tyre janë të lindur jashtë Kosovës. Bëhet fjalë për lojtarë të lindur kryesisht në Zvicër, Gjermani dhe Austri, të cilët sot përfaqësojnë “Dardanët”.
Në portë janë Arijanet Muric dhe Amir Saipi, të dy të lindur në Zvicër. Në mbrojtje bëjnë pjesë Mërgim Vojvoda, i lindur në Gjermani, dhe Albian Hajdari, i lindur në Zvicër.
Mesfusha ka gjithashtu një prani të madhe të futbollistëve të lindur jashtë Kosovës. Vesel Demaku ka lindur në Austri, Veldin Hoxha në Kroaci, ndërsa Dion Kacuri, Leon Avdullahu dhe Valmir Matoshi kanë lindur në Zvicër.
Leon Avdullahu dhe Albian Hajdari
Në sulm, një tjetër emër i lindur jashtë Kosovës është Fisnik Asllani, i cili ka lindur në Berlin të Gjermanisë.
Por dy prej rasteve më interesante në këtë listë janë Edon Zhegrova dhe Ilir Krasniqi.
Të dy kanë lindur në Gjermani, por rrugëtimi i tyre është ndryshe nga ai i shumë futbollistëve të tjerë të diasporës.
Zhegrova ka lindur në Herford, por është rritur në Prishtinë dhe hapat e parë në futboll i ka bërë te Flamurtari dhe Prishtina.
Edhe Ilir Krasniqi ka lindur në Gjermani, në Bocholt, por është rritur në Kosovë dhe formimin e parë futbollistik e ka marrë te Fushë Kosova, para se të kalonte te KEK-u dhe më pas të ndërtonte karrierën profesionale te Llapi.
Edon Zhegrova dhe Fisnik Asllani
Pra, edhe pse në dokumente figurojnë si futbollistë të lindur jashtë Kosovës, Zhegrova dhe Krasniqi janë raste të veçanta: ata e kanë nisur rrugëtimin futbollistik në Kosovë dhe më pas e kanë vazhduar karrierën jashtë vendit, duke u kthyer për ta përfaqësuar vendin e tyre në nivel ndërkombëtar.
Në listën e Fodës është edhe Erblin Osmani, talenti i Bayern Munichut, i cili është lindur në Gjermani dhe për herë të parë është ftuar në Kombëtaren A të Kosovës.
Osmani, i lindur në Gjermani, ka luajtur më parë për grupmoshat e Gjermanisë U16 dhe U17, duke regjistruar gjithsej nëntë paraqitje për grupmoshat e të rinjve të “Pancerëve”.
Megjithatë, Osmani vendosi që në nivelin senior të përfaqësojë Kosovën. Ai u ftua për herë të parë nga Franco Foda në Kombëtaren A dhe më 24 shtator 2026 debutoi ndaj Irlandës në Ligën e Kombeve, duke u bërë edhe debutuesi më i ri në historinë e Kosovës, në moshën 17 vjeç, katër muaj e pesë ditë.
Erblin Osmani
Kështu, diaspora përbën një pjesë të konsiderueshme të grupit aktual të Kosovës, por historia e Zhegrovës dhe Krasniqit tregon edhe një tjetër dimension: jo të gjithë futbollistët e lindur jashtë vendit janë formuar jashtë Kosovës./Kampionet/
