Përzgjedhësi i Zvicrës, Murat Yakin, ka munguar në konferencën për media para ndeshjes ndaj Skocisë në Ligën e Kombeve.
Sipas raportimit të mediumit zviceran “Blick”, Yakin ka përjetuar vështirësi me presionin gjatë fluturimit drejt Skocisë, gjë që i ka shkaktuar probleme me dëgjimin.
Për këtë arsye, trajneri zviceran vendosi të mos paraqitej para gazetarëve në konferencën tradicionale para ndeshjes.
“Yakin pati vështirësi me presionin gjatë fluturimit dhe për këtë arsye vendosi të mos merrte pjesë në konferencën për shtyp”, ka raportuar “Blick”.
Në vend të tij, pyetjeve të gazetarëve iu përgjigj ndihmëstrajneri Davide Calla, së bashku me mbrojtësin Nico Elvedi, të cilët folën për përgatitjet e skuadrës para sfidës së radhës në Ligën e Kombeve.
Problemet për Zvicrën kishin nisur që gjatë udhëtimit drejt Skocisë.
Për shkak të një mospërputhjeje në llogaritjen e peshës së avionit, skuadra u detyrua të ndryshonte planin e fluturimit.
Avioni fillimisht u detyrua të shkarkonte karburant në Shkup, ndërsa më pas bëri një ndalesë në Cyrih për t’u furnizuar sërish me karburant.
E gjithë kjo shkaktoi vonesa të konsiderueshme, me ekipin zviceran që mbërriti në destinacion rreth tri orë më vonë se koha e planifikuar.
Kështu, një udhëtim që duhej të ishte rutinë u shndërrua në një situatë të pazakontë për përfaqësuesen zvicerane, ndërsa mungesa e Yakin në konferencën para ndeshjes ishte një tjetër zhvillim i papritur.
Zvicra tani synon të lërë pas këto probleme dhe të fokusohet plotësisht në përballjen me Skocinë, ku pikët janë të rëndësishme për objektivat e saj në Ligën e Kombeve. /Kampionet/
