Italia ka marrë pikët e para në grupin e fortë të Ligës së Kombeve, pasi ka mposhtur Turqinë me rezultat 4-1, në një ndeshje të dominuar nga italianët, të cilët praktikisht e siguruan fitoren që në pjesën e parë.
Skuadra e drejtuar nga Roberto Mancini e zhbllokoi ndeshjen në minutën e 9-të. Alessandro Bastoni u gjend mirë në zonë pas një goditjeje nga këndi dhe me një goditje të saktë e dërgoi topin në rrjetë për 1-0.
Italia vazhdoi të ishte më e rrezikshme dhe në minutën e 22-të e dyfishoi epërsinë. Davide Frattesi ishte në vendin e duhur pas një topi të kthyer dhe nga afërsia realizoi për 2-0.
Pesë minuta më vonë, Michael Kayode shënoi edhe golin e tretë pas një asistimi të bukur nga Francesco Pio Esposito, duke e çuar Italinë në pushim me avantazh të madh.
Turqia u përpoq të reagonte në fillim të pjesës së dytë dhe në minutën e 47-të Baris Yilmaz shënoi për 1-3, pas asistimit të Oguz Aydin.
Mirëpo, vetëm tri minuta më vonë Italia riktheu diferencën prej tri golash. Francesco Pio Esposito ishte më i shpejti pas një topi të kthyer dhe me kokë realizoi për 4-1.
Me këtë rezultat, Italia regjistron pikët e para, ndërsa Turqia mbetet pa pikë pas kësaj ndeshjeje. Grupi është veçanërisht i fortë, pasi në garë janë edhe Belgjika dhe Franca, duke e bërë çdo pikë të rëndësishme në luftën për vazhdimin e garës. /Kampionet/
