Rodrigo Hernández, i njohur si Rodri, ka zbuluar më shumë detaje rreth interesimit të Real Madridit për të gjatë verës, përpara se të vendoste të transferohej te Barcelona.
Mesfushori spanjoll, i cili këtë verë u largua nga Manchester City për t’iu bashkuar Barcelonës, ka bërë të qartë se vendimi për të mos kaluar te Real Madridi nuk erdhi për shkak të mungesës së interesimit nga klubi madrilen. Përkundrazi, Rodri ka treguar se drejtuesit e “Los Blancos” bënë përpjekje serioze për ta bindur.
“Nga pozicioni im, duhet të them se Madridi tregoi interes që nga fillimi, se ata u sollën në një mënyrë shembullore dhe se ofertat e tyre ishin për lojtarin; dua ta bëj të qartë edhe këtë”, tha Rodri në programin radiofonik “El Partidazo de COPE”.
I pyetur nëse Real Madridi kishte bërë gjithçka për ta transferuar, Rodri pranoi se klubi madrilen kishte treguar interes maksimal, edhe pse nuk dëshiroi të përcaktonte se çfarë do të nënkuptonte konkretisht “100 për qind”.
“Nuk e di çfarë do të thotë të japësh 100%, por është e qartë se ata ishin të interesuar dhe dhanë gjithçka që kishin, duke treguar interesin e tyre, gjë që e vlerësoj, sepse fola me disa prej tyre dhe kaq”, u shpreh ai.
Rodri nuk zbuloi nëse kishte pasur kontakt të drejtpërdrejtë me presidentin e Real Madridit, Florentino Perez, por konfirmoi se kishte komunikuar me persona brenda klubit madrilen. Sipas tij, ata i kishin përcjellë dëshirën dhe entuziazmin për ta parë atë në “Santiago Bernabéu”.
“Fola me njerëz atje, të cilët përcollën entuziazmin dhe dëshirën e tyre që unë të shkoja atje, dhe kjo gjithashtu e bëri vendimin tim më të komplikuar, kjo është e qartë”, deklaroi mesfushori.
Megjithatë, Rodri në fund zgjodhi Barcelonën. Ai ka shpjeguar edhe më herët se vendimi ishte i bazuar kryesisht në aspektin sportiv dhe në projektin që i ofroi klubi katalanas. Vetë lojtari e ka pranuar se refuzimi i Real Madridit nuk ishte një vendim i lehtë, sidomos për shkak të mënyrës se si klubi madrilen u soll gjatë negociatave.
Rodri tashmë është pjesë e Barcelonës, ku ka firmosur kontratë deri në vitin 2030 dhe është përshtatur shpejt me skuadrën e Hansi Flickut. /Kampionet/
