Motra e Cristiano Ronaldos, Elma Aveiro, ka folur për CNN Portugal lidhur me konfliktin mes vëllait të saj dhe përzgjedhësit portugez Jorge Jesus, duke lënë të kuptohet se një pajtim mes tyre duket i vështirë.
Ajo i bëri këto deklarata në Lisbonë, pas një promovimi libri ku ishte i pranishëm edhe Jesus.
Ronaldo, 41 vjeç, u largua nga grumbullimi i Kombëtares së Portugalisë një ditë para ndeshjes së Ligës së Kombeve kundër Danimarkës, pas së cilës udhëtoi drejt Madridit. Në një deklaratë të publikuar më vonë, ai mori përgjegjësinë për largimin nga grumbullimi, por akuzoi Jesusin se nuk e kishte mbajtur fjalën e dhënë gjatë bisedimeve të mëparshme.
“Ka më shumë gjasa që ai të mos kthehet sesa të kthehet. Mendoj se si Cristiano, ashtu edhe Jorge Jesus janë të lënduar. Kjo është një situatë që e kanë përjetuar ata, jo unë. Unë po flas në emër të vëllait tim”, deklaroi Elma Aveiro.
E pyetur nëse një pajtim mes tyre është i mundur, ajo u shpreh se gjërat janë tejet të komplikuara.
“Nuk e di, është shumë e komplikuar. Kur na tradhtojnë, është shumë e vështirë të kthehemi në normalitet. Ndihem e trishtuar sepse populli portugez, për fat të keq, harron atë që është bërë deri më tani dhe mendon se gjërat duhet të bëhen ndryshe tani”, shtoi ajo.
Elma Aveiro pranoi se e ka të vështirë ta shohë vëllanë e saj duke kaluar nëpër këtë situatë.
“Jam pa fjalë. Është shumë e vështirë për mua ta shoh vëllanë tim duke kaluar nëpër këtë. Ai është një nga njerëzit që e meriton më së paku këtë”, përfundoi ajo.
Nga ana tjetër, Jorge Jesus e ka cilësuar situatën si një keqkuptim pas incidentit, duke lënë të hapur mundësinë e rikthimit të Ronaldos në Kombëtare, nëse ai vazhdon të luajë për Al Nassr dhe dëshiron të rikthehet.
Edhe Ronaldo, në deklaratën e tij, bëri të ditur se është i gatshëm t’i përgjigjet sërish një ftese, nëse përzgjedhësi vendos ta thërrasë. Megjithatë, për momentin, mbetet e paqartë nëse ylli portugez do ta veshë përsëri fanellën e kombëtares./Kampionet/
