Liverpooli raportohet se ka ringjallur interesimin për yllin e Real Madridit, Kylian Mbappe, mes raportimeve se sulmuesi francez mund të largohet nga “Santiago Bernabeu” në vitin 2027.
Në javët e ardhshme, Mbappe pritet të jetë një nga emrat kryesorë që do të presë me ankth shpalljen e fituesit të Topit të Artë për vitin 2026, në ceremoninë e 70-të që do të mbahet në “London Palladium Theatre”.
Megjithatë, kjo nuk është arsyeja e vetme pse francezi po përmendet shumë në media. Sipas raportimeve të fundit, Mbappe mund të largohet nga Real Madridi që në verën e ardhshme, ndërsa Liverpooli thuhet se ka nisur të shqyrtojë një lëvizje që do ta thyente në mënyrë spektakolare rekordin e transferimeve në Ligën Premier.
27-vjeçari, i cili zhvilloi një Kampionat Botëror fantastik me Francën këtë verë, shihet si një nga favoritët kryesorë për “Topin e Artë” të këtij viti.
Edhe në sezonin e ri, Mbappe ka vazhduar formën e shkëlqyer, duke shënuar tetë gola në tetë paraqitje në La Liga dhe Ligën e Kampionëve.
Megjithatë, gazetari spanjoll Francois Gallardo pretendon se Mbappe është “i zemëruar dhe i zhgënjyer” me Real Madridin dhe tashmë ka vendosur të largohet nga klubi, madje që në verën e vitit të ardhshëm.
Në rast se largimi realizohet, nuk do të mungojnë klubet e interesuara për shërbimet e tij. Por, sipas Gallardos, Liverpooli mbetet destinacioni i preferuar i sulmuesit francez, i cili në vitin 2016 ishte shumë pranë një transferimi te klubi nga “Anfield”.
Në atë kohë, mediat raportuan gjerësisht se nëna e Mbappes ishte “dashuruar” me Liverpoolin, ndërsa tani ajo mund të jetë pika e parë e kontaktit të klubit anglez në përpjekjen për ta ringjallur transferimin e shumëpërfolur.
Megjithatë, nëse Liverpooli arrin ta bindë Mbappen për të kaluar më në fund në “Anfield”, transferimi nuk do të jetë aspak i lirë.
Sipas Gallardos, kostoja e operacionit mund të arrijë në rreth 200 deri në 250 milionë euro, një shumë që do ta kthente transferimin në një prej marrëveshjeve më të mëdha në historinë e futbollit./Kampionet/
