Rrjetet sociale u pushtuan së fundmi nga disa imazhe “tronditëse”, që pretendonin se Lionel Messi ishte takuar fshehurazi me zyrtarë të Katarit dhe presidentin e FIFA-s, Gianni Infantino, pak para fillimit të Kupës së Botës 2022.
Fotot, të publikuara nga një YouTuber i njohur madrilen me profil futbolli, u paraqitën si “ekskluzive botërore” dhe morën mbi 5.8 milionë shikime në platformën X (ish-Twitter), duke shkaktuar një valë teorish konspirative dhe akuza të shumta ndaj Messit dhe organizatorëve të Botërorit.
Në pamjet e shpërndara, ylli argjentinas shihej në një ambient zyrtar në shoqërinë e një delegacioni nga Katari dhe të vetë Infantinos – diçka që shumë përdorues e interpretuan si “takim sekret” për të ndikuar rezultatin e turneut.
E vërteta pas fotove
Pas bujës së madhe, u zbulua se fotot nuk ishin të vërteta. Të gjitha imazhet ishin të krijuara nga inteligjenca artificiale (AI).
Një analizë e detajuar e pamjeve zbuloi shenja të qarta manipulimi – forma të shtrembëruara të duarve, ndriçim të pasaktë, përmasa joproporcionale dhe ngjyra të paqëndrueshme, tipike për imazhet e gjeneruara nga AI.
Madje, përdorues të shumtë vunë re se objektet në sfond dhe elementet dekorative nuk përputheshin me ndonjë ambient real, duke vërtetuar se bëhej fjalë për manipulim digjital.
Asnjë provë për “marrëveshje të fshehtë”
Pavarësisht teorive që qarkulluan, nuk ekziston asnjë provë që Lionel Messi të ketë zhvilluar ndonjë takim të fshehtë me zyrtarë të FIFA-s apo të Katarit para Kupës së Botës.
Argjentina fitoi titullin botëror pas një rruge të vështirë dhe një finale epike kundër Francës, pa asnjë indicie për ndikim të jashtëm.
Ky rast tregon edhe një herë rrezikun që paraqet përhapja e imazheve të rreme të krijuara nga inteligjenca artificiale, veçanërisht kur në qendër të tyre janë figura të mëdha si Messi – ku një mashtrim i vetëm vizual mund të mjaftojë për të manipuluar opinionin publik në mbarë botën. /Kampionet/
