Portieri gjerman i Barcelonës, Marc-Andre ter Stegen, është rikthyer në stërvitje pas disa muajsh mungesë për shkak të një operacioni në shpinë.
Ter Stegen iu nënshtrua ndërhyrjes kirurgjikale në pjesën e poshtme të shpinës në korrik dhe u vlerësua se do të mungonte rreth katër muaj. Sipas të gjitha gjasave, ai mund të rikthehet në fushë gjatë nëntorit ose dhjetorit.
Sot, 33-vjeçari është parë duke kryer ushtrime të lehta me skuadrën, ndërsa stafi teknik i Barcelonës po tregohet i kujdesshëm për të shmangur çdo rikthim të dëmtimit.
Marc Andre ter Stegen
Ter Stegen synon të rikthehet sa më shpejt në formë të plotë, pasi dëshiron të sigurojë një vend në listën e Gjermanisë për Kupën e Botës 2026. Megjithatë, konkurrenca te Barcelona mbetet e fortë.
Joan García, që ishte bërë portieri titullar nën drejtimin e Hansi Flick, është aktualisht jashtë fushave për shkak të një dëmtimi në gju, ndërsa Wojciech Szczesny po bën paraqitje të mira në mungesë të tij.
Sipas raportimeve, ter Stegen mund të shqyrtojë edhe një largim gjatë afatit kalimtar të janarit për të siguruar më shumë minuta loje në një klub tjetër./Kampionet
