Vinicius Junior do të rikthehet në Madrid pas grumbullimit me Kombëtaren e Brazilit, por pa arritur të largojë dyshimet që janë krijuar rreth formës së tij që prej fillimit të sezonit.
Paraqitjet e brazilianit me përfaqësuesen nuk kanë qenë të mjaftueshme për të ndryshuar situatën, ndërsa shqetësimi në klubin madrilen për formën e tij po rritet.
Vinicius kishte shpresuar ta shfrytëzonte këtë periudhë ndërkombëtare për të rikthyer ritmin dhe vetëbesimin, veçanërisht në një ambient si Kombëtarja e Brazilit.
Megjithatë, edhe gjatë këtij grumbullimi ai ka shfaqur një version larg atij që tifozët e Real Madridit janë mësuar ta shohin.
Sulmuesi ka luajtur gjithsej 192 minuta në tri ndeshje dhe ka shënuar vetëm një gol, nga pika e bardhë në ndeshjen miqësore ndaj Australisë.
Edhe pse angazhimi dhe qëndrimi i tij në fushë kanë qenë pozitivë, Vinicius ka qenë i pasaktë në zonat ku në sezonet e kaluara ishte një prej lojtarëve më vendimtarë.
Braziliani do të rikthehet në kryeqytetin spanjoll pa dhënë ende një përgjigje të qartë ndaj pikëpyetjeve që janë krijuar rreth tij.
Sipas OK Diario, Real Madridi ende nuk e ka humbur besimin te Vinicius, por ekziston një shqetësim në rritje rreth kohës që do t’i duhet brazilianit për t’u rikthyer në nivelin e tij më të mirë.
Klubi madrilen ka tentuar ta mbështesë dhe ta mbrojë lojtarin, ndërsa trajneri Jose Mourinho po kërkon mënyra për ta rikthyer në formën e tij më të mirë.
Edhe vetë Vinicius ka pranuar publikisht se duhet të rikuperojë vetëbesimin.
Problemi, sipas raportimeve, nuk lidhet më vetëm me një apo dy paraqitje jo të mira. Fillimi i sezonit ka nisur të krijojë një tendencë që po shqetëson drejtuesit e klubit.
Edhe gazeta Marca e sheh këtë periudhë si një mundësi të humbur për Viniciusin për të rikuperuar besimin.
Sipas gazetës spanjolle, tashmë përgjegjësia i bie Mourinhos për të nxjerrë më të mirën nga braziliani.
Vinicius ka regjistruar vetëm një gol dhe dy asistime në tetë ndeshje, një statistikë që është larg pritshmërive të krijuara pas rinovimit të kontratës së tij me Real Madridin.
Në klub e dinë se rikthimi i Viniciusit në nivelin e tij më të mirë është i rëndësishëm për objektivat e sezonit. Real Madridi nuk dëshiron të humbasë terren në garën për titull që në këtë fazë, ndërsa diferenca prej gjashtë pikësh me liderin e bën edhe më të rëndësishëm përballjen e 25 tetorit ndaj Barcelonës.
Në të kaluarën, Vinicius ka qenë shpesh protagonist në ndeshjet ndaj Barcelonës, ndërsa tani, në prag të një tjetër përballjeje të madhe, Reali pret që braziliani të japë përgjigjen në fushë. /Kampionet/
