Ferland Mendy ende nuk e ka nisur sezonin 2026/27 në fushën e futbollit. Mbrojtësi francez vazhdon të jetë në fazën e rikuperimit nga dëmtimi dhe po punon për t’u kthyer në formën më të mirë, me synimin për të fituar besimin e trajnerit të Real Madridit, Jose Mourinho, por edhe të përfaqësueses së Francës.
Sezoni i ri ende nuk ka nisur për Mendy, të paktën sa i përket paraqitjeve në fushë. Për momentin, gjurmët e mbrojtësit 31-vjeçar gjenden në qendrën stërvitore të Real Madridit në Valdebebas, ku ai po vazhdon procesin e rehabilitimit.
Problemet fizike kanë qenë një shqetësim i vazhdueshëm për francezin që prej transferimit te “Los Blancos” nga Lyon në vitin 2019.
Sipas të dhënave të Transfermarkt, Mendy ka munguar rreth 20 herë për shkak të lëndimeve gjatë periudhës së tij në Madrid. Vetëm sezonin e kaluar, ai pësoi pesë dëmtime.
Lëndimi i fundit erdhi më 3 maj, në ndeshjen e La Ligës ndaj Espanyolit, ku Mendy luajti vetëm 14 minuta. Mbrojtësi pësoi një dëmtim të tendinit, i shoqëruar me dëmtim të kockës, duke e lënë atë jashtë fushave për një periudhë të gjatë.
Pas këtij dëmtimi, disa media ngritën edhe mundësinë që Mendy mund t’i jepte fund karrierës, megjithatë, kjo nuk është në planet e tij.
Francezi synon të rikthehet në gjendjen më të mirë fizike dhe të bindë Mourinho se ende mund të ketë një rol të rëndësishëm në skuadër.
Por rruga drejt formacionit nuk do të jetë e lehtë.
Gjatë verës, Mourinho afroi Marc Cucurellan, të cilin e ka vendosur si zgjedhjen kryesore në krahun e majtë të mbrojtjes.
Ndërkohë, Alvaro Carreras, i transferuar nga Benfica për 50 milionë euro, shihet si alternativë për spanjollin.
Fran Garcia, i cili nuk bënte pjesë në planet e trajnerit portugez, u largua nga Real Madridi dhe iu bashkua Real Betisit.
Mendy përballet me një sfidë të dyfishtë
Mendy ka përpara një sfidë të madhe. Fillimisht duhet të përfundojë me sukses rehabilitimin dhe të rikthehet në fushë, ndërsa më pas do të duhet të bindë stafin e ri teknik se meriton minuta.
Vetë francezi dha një sinjal pozitiv të hënën, kur foli shkurtimisht për gjendjen e tij pas stërvitjes.
“Rikuperimi nga dëmtimi? Mirë, mirë… më mirë”, deklaroi Mendy për El Chiringuito.
Mediat spanjolle raportuan gjithashtu se ai tashmë është parë duke punuar me top në fushat stërvitore të Valdebebasit, një tjetër shenjë se rikthimi i tij po afrohet.
Megjithatë, edhe pas rikuperimit, Mendy do të duhet të luftojë për hapësirë në një repart ku Mourinho tashmë ka krijuar hierarkinë e tij.
Një situatë e tillë mund të hapë edhe mundësinë e largimit të tij nga Madridi në të ardhmen, por vendimi do të varet edhe nga ambiciet e vetë lojtarit.
Për Mendyn ekziston edhe një tjetër objektiv: rikthimi te përfaqësuesja e Francës.
Zinedine Zidane, trajneri i ri i “Les Bleus” dhe njëkohësisht personi që e solli Mendyn te Real Madridi, e njeh mirë mbrojtësin dhe ka vlerësim për të.
Megjithatë, konkurrenca në krahun e majtë është shtuar.
Theo Hernandez dhe Lucas Digne, të cilët ishin pjesë e Francës në Botëror, janë lënë jashtë planeve të fundit, ndërsa Adrien Truffert dhe Andy Diouf kanë treguar paraqitje pozitive.
Për momentin, rikthimi te Franca duket ende larg për Mendyn, i cili numëron 10 paraqitje me kombëtaren.
Ndeshja e fundit e tij me “Les Bleus” ishte më 10 qershor 2024 ndaj Kanadasë, që përfundoi 0-0.
Por për momentin, Mendy ka një prioritet shumë më të madh: të rikuperohet plotësisht, të rikthehet në fushë dhe të fitojë një vend në planet e Mourinhos te Real Madridi. /Kampionet/
