Rivaliteti i përjetshëm mes Barcelonës dhe Real Madridit po zhvendoset edhe në sallat e gjyqit.
Presidenti i Real Madridit, Florentino Perez, dhe përfaqësuesit e Barcelonës janë thirrur në një seancë dëgjimore ndërmjetësimi më 25 nëntor, lidhur me deklaratat e bëra nga presidenti madrilen për rastin Negreira.
Nëse përpjekja për ndërmjetësim dështon, klubi katalanas ka paralajmëruar se mund të ngrejë një padi penale për shpifje ndaj Perezit.
Deklaratat e Perezit që shkaktuan procedurat
Një gjykatë në Madrid ka caktuar procedurën e pajtimit si hap paraprak përpara një akuze të mundshme penale. Barcelona i kërkon Perezit të tërheqë deklaratat që klubi i konsideron dëmtuese për reputacionin e tij dhe që presidenti i Real Madridit i bëri gjatë një konference për shtyp më 12 maj.
Në atë konferencë, Perez foli gjerësisht për rastin Negreira, pagesat e bëra ndër vite nga Barcelona ndaj Jose Maria Enrique Negreiras, ish-zëvendëspresidentit të Komitetit Teknik të Gjyqtarëve në Spanjë, si dhe për ndikimin që, sipas tij, kjo çështje ka pasur në futbollin spanjoll.
“Kam fituar shtatë Liga Kampionësh dhe shtatë tituj lige, dhe mund të kenë qenë 14, sepse më janë vjedhur shtatë tituj”, kishte deklaruar Perez.
Presidenti i Real Madridit kishte folur edhe për qëndrimin e klubit madrilen ndaj rastit Negreira.
“Anëtarët e Realit janë me mua në luftën kundër Negreiras. Nuk është gjithmonë vetëm Madridi që dëmtohet, por edhe klubet e tjera. Barcelona gjithmonë përfiton”, kishte thënë Perez.
Barcelona kërkon tërheqjen e deklaratave
Pas këtyre deklaratave, departamenti ligjor i Barcelonës analizoi situatën dhe në qershor nisi procedurat e pajtimit. Qëllimi i klubit katalanas është që Perez të tërheqë pretendimet që Barcelona i konsideron shpifëse dhe dëmtuese për imazhin e saj.
Nëse presidenti i Real Madridit nuk tërhiqet nga deklaratat, Barcelona ka paralajmëruar se do të vazhdojë me hapin tjetër dhe do të kërkojë ngritjen e një padie penale.
Perez, gjatë së njëjtës periudhë, e kishte përshkruar rastin Negreira si “skandalin më të madh të korrupsionit në historinë e futbollit” dhe kishte bërë të ditur se Real Madridi po përgatiste një dosje të gjerë për t’ia paraqitur UEFA-s.
Në qershor, Real Madridi i kërkoi UEFA-s të rihapte procedurat disiplinore ndaj Barcelonës, duke pretenduar se kishte prova të reja lidhur me pagesat e bëra ndaj Negreiras. Barcelona, nga ana tjetër, i ka kundërshtuar këto interpretime dhe ka vlerësuar se deklaratat e Perezit kanë kaluar kufijtë e kritikës së lejueshme.
Seanca e ndërmjetësimit është caktuar për 25 nëntor dhe do të jetë një përpjekje për të zgjidhur mosmarrëveshjen përpara se çështja të kalojë në një fazë të mundshme penale. /Kampionet/
