Skandalet dhe Mauro Icardi duket se shkojnë dorë për dore. Tani sulmuesi argjentinas është rikthyer në qendër të vëmendjes dhe arsyeja nuk ka të bëjë fare me futbollin.
Sulmuesi argjentinas e ka humbur patentën e drejtimit në Argjentinë pasi një video u shfaq në rrjetet sociale, ku ai shihet duke drejtuar një makinë, ndërsa partnerja e tij Eugenia “China” Suarez po varej nga dritarja e automjetit.
Futbollisti, i cili së fundmi i dha fund kontratës me Galatasarayn, po drejtonte makinën ndërsa Suarez hoqi rripin e sigurimit dhe hodhi pjesën më të madhe të trupit të saj nga dritarja.
Pas publikimit të regjistrimit, reagoi Ministria e Transportit e provincës së Buenos Aires. Icardi u gjet me një patentë shoferi argjentinase të skaduar, prandaj atij iu dha një pezullim parandalues i drejtimit deri në vitin 2099.
Autoritetet theksuan se kjo lloj sjelljeje është një kërcënim i drejtpërdrejtë për sigurinë e të gjithë përdoruesve të rrugës, por gjithashtu vunë në dukje se është një masë parandaluese – që do të thotë se Icardi mund të kërkojë përsëri një patentë nëse vërteton se është i aftë të ngasë në mënyrë të sigurt.
Icardi shpejt kritikoi ashpër autoritetet argjentinase nëpërmjet mediave sociale.
“Do të doja të dija se si mund ta zhvlerësoni patentën time italiane të shoferit të vlefshme deri në vitin 2029. Më duket mjaft e çuditshme që edhe Ministria e Transportit po merret me rastin tim. Do të ishte më mirë për ta të rregullonin rrugët në vend që të mos bënin asgjë”, tha ai.
Megjithatë, sipas informacionit në dispozicion, megjithëse Icardi ka një patentë shoferi italiane të vlefshme, ai duhej ta regjistronte atë në Argjentinë në vitin 2019, gjë që nuk e ka bërë deri më sot. /Kampionet/
