Manchester City konfirmoi sot (e premte) se kishte nisur një “apel gjithëpërfshirës” pasi një komision i pavarur vendosi që klubi kishte shkelur rregullat financiare të Ligës Premier.
Liga Premier njoftoi të martën se një komision i pavarur e kishte shpallur klubin e mbështetur nga Abu Dhabi fajtor për më shumë se 100 akuza.
10 herë kampionët e Anglisë, të cilët gjithmonë i kanë mohuar me forcë të gjitha akuzat kanë lëshuar një deklaratë sot, duke thënë se kishin paraqitur një ankesë të enjten – një ditë para afatit të fundit.
“Klubi i Futbollit Manchester City mund të konfirmojë se në orën 19:00 të së enjtes, më 1 tetor 2026, klubi paraqiti ankesën e tij gjithëpërfshirëse kundër mendimit të komisionit të Ligës Premier, në lidhje me çështjen disiplinore të Ligës Premier”, thuhet fillimisht në njoftimin e Cityt.
“Qëndrimi i fortë i klubit është se, për arsye të shumëfishta, opinioni përmban gabime të qarta materiale, ligjore, parimore dhe faktike dhe është i pasigurt”.
“Klubi është i pafajshëm për akuzat e bëra nga Liga Premier dhe ekziston një sasi e plotë provash të pakundërshtueshme në mbështetje të të gjitha qëndrimeve të tij, në lidhje me këtë rast”.
“Ne do të vazhdojmë të respektojmë procesin e rregullt ligjor dhe jemi domosdoshmërisht të kufizuar në atë që mund të themi më tej derisa të përfundojnë të gjitha procedurat”, mbyllet njoftimi.
Seanca dëgjimore pritet brenda 12 javësh
City ka përmendur grupin e tyre të “provave të pakundërshtueshme” që do të pastrojnë emrin e klubit dhe pritet të argumentojnë se qeveria e Abu Dhabit – jo pronarët e klubit – financoi pjesërisht marrëveshjet e sponsorizimit.
Rregullat e reja të procedurës së përshpejtuar të Ligës Premier përcaktojnë se një seancë dëgjimore për apelim duhet të mbahet brenda 12 javësh nga paraqitja e një apelimi, me një vendim që duhet të merret brenda 30 ditëve nga përfundimi i seancës dëgjimore.
Megjithatë, City pritet të argumentojë se rregullat nuk ishin në fuqi kur u ngritën akuzat fillimisht në shkurt 2023.
Gjerësia e pasojave me të cilat përballet Manchester City shtrihet përtej sanksioneve të futbollit.
Avokatët e sportit kanë parashikuar vite të tëra padish të mëtejshme, ndërsa klubet rivale, lojtarët dhe agjentët vlerësojnë nëse mund të kenë arsye për të ndjekur kërkesa për kompensim të lidhura me çështjen. /Kampionet/
