Julian Alvarez mund të largohet nga Atletico Madridi në të ardhmen, por klubi madrilen raportohet se i ka vendosur një kusht sulmuesit argjentinas.
Sipas gazetarit Pipi Estrada, presidenti i Atletico Madridit, Miguel Angel Gil Marin, i ka premtuar Alvarezit se do t’ia ulë klauzolën e largimit nëse ai shënon të paktën 20 gola gjatë këtij sezoni.
Shuma e re e klauzolës nuk është bërë e ditur, ndërsa Alvarez ka kontratë me klubin deri në vitin 2030. Argjentinasi, i cili iu bashkua Atleticos nga Manchester City në vitin 2024, realizoi 20 gola në 49 paraqitje sezonin e kaluar, duke dhënë edhe nëntë asistime.
E ardhmja e tij ishte temë e rëndësishme gjatë verës, me Barcelonën dhe Arsenalin që u lidhën me një transferim të mundshëm. Megjithatë, Alvarez vazhdoi në La Liga.
Sulmuesi ishte titullar ndaj Liverpoolit në Ligën e Kampionëve dhe asistoi për golin e Marcos Llorentes, ndërsa më pas pësoi një kontraktim muskulor që e la jashtë ndeshjes ndaj Real Sociedadit.
Nëse arrin shifrën e 20 golave, situata e Alvarezit mund të bëhet sërish një nga temat kryesore të afatit kalimtar, me Barcelonën dhe Arsenalin që raportohet se po e monitorojnë situatën e tij. /Kampionet/
