Barcelona ka marrë një ofertë prej 35 milionë eurosh për Robert Lewandowskin nga Arabia Saudite në prag të merkatos së janarit, sipas raportimeve të “Fichajes”.
Sulmuesi polak, i cili pritet të largohet nga “Camp Nou” në verën e ardhshme kur t’i skadojë kontrata, mund të përfundojë transferimin e tij më herët se parashikohej. Një klub i paidentifikuar nga Liga Saudite ka ndërmarrë hapa për ta sjellë Lewandowskin që në janar, duke dërguar një ofertë zyrtare në drejtim të Barcelonës.
Raporti thekson se drejtuesit katalanas po shqyrtojnë me kujdes ofertën dhe nuk e kanë përjashtuar shitjen e 37-vjeçarit. Edhe pse klubi ka nevojë urgjente për të ardhura shtesë, stafi teknik është i vetëdijshëm për rëndësinë që ka përvoja dhe kontributi i Lewandowskit në pjesën e dytë të sezonit.
Në këtë pikë, vendimi përfundimtar do të varet nga Hansi Flick dhe drejtuesit ekonomikë të klubit, të cilët duhet të balancojnë nevojat sportive me ato financiare.
Ndërkohë ende nuk dihet nëse polaku është i hapur për t’u larguar nga katalunasit, pasi aktualisht po rikuperohet nga lëndimi./Kampionet/
