Andres Iniesta vazhdon të jetë i impresionuar nga Barcelona dhe skuadra e drejtuar nga Hansi Flick.
Legjenda e klubit katalunas ka lavdëruar stilin e lojës së Barcelonës, duke veçuar në mënyrë të veçantë talentin e Lamine Yamalit dhe ndikimin që mund të ketë Rodri pas transferimit te gjiganti spanjoll.
Në një intervistë për “Mundo Deportivo”, Iniesta ka treguar se vazhdon ta shijojë mënyrën se si luan Barcelona dhe Kombëtarja e Spanjës, duke theksuar cilësinë dhe inteligjencën e futbollistëve të gjeneratës së re.
“Më pëlqen ta shikoj Barçën dhe më pëlqen ta shikoj Spanjën. Njësoj si më parë, kur luaja unë”.
“Janë skuadra me atë lloj stili loje dhe me lojtarë që, natyrisht, më pëlqejnë”.
“Mënyra se si luajnë dhe, mbi të gjitha, talenti i tyre dhe mënyra se si e kuptojnë lojën. Po flasim për më të mirët”.
Një pjesë e veçantë e intervistës i është kushtuar edhe Lamine Yamalit. Iniesta ka bërë të qartë se ajo që 19-vjeçari ka arritur deri tani nuk është aspak diçka normale.
“Nuk është normale, sepse nëse do të ishte, do të kishte më shumë lojtarë që mund të bënin të njëjtën gjë”.
“Nuk është normale dhe bukuria dhe rëndësia e gjithë kësaj qëndron te ambicia e tij, talenti i natyrshëm dhe fakti se, nëse ndalesh e mendon, ajo që e pret përpara në atë moshë është diçka e mrekullueshme”.
Iniesta ka paralajmëruar gjithashtu se sfida më e madhe për Yamalin tashmë është ta mbajë këtë nivel, sidomos pasi në një moshë kaq të re ka fituar trofe të rëndësishëm.
“E vetmja gjë është se sfida për një futbollist, dhe për skuadra si Barça, është nga viti në vit. Nuk bëhet fjalë për atë që ke fituar, por për atë që duhet të vazhdosh të fitosh çdo vit.
“Kjo është çelësi dhe kjo është sfida me të cilën përballen aktualisht të gjithë këta lojtarë që, në moshën e tij, kanë fituar tashmë disa trofe shumë të rëndësishëm, madje edhe më të rëndësishmit, por që tani kanë sfidën të vazhdojnë ta bëjnë këtë vit pas viti”.
Iniesta ka folur me superlativa edhe për Rodrin, duke besuar se transferimi i mesfushorit mund ta ndihmojë Barcelonën në objektivin për të triumfuar në Ligën e Kampionëve.
“Po, sigurisht. Të kesh një lojtar si Rodri padyshim që e ngre standardin.
“Një lojtar i tillë, në nivelin e tij, me rëndësinë që ka brenda skuadrës dhe me mënyrën se si e kupton lojën, padyshim që e çon ekipin në një tjetër nivel”, ka përfunduar Iniesta./Kampionet/
