Andoni Iraola ka vetëm tre muaj në krye të Liverpoolit, por trajneri spanjoll nuk po frikësohet nga marrja e vendimeve të mëdha.
Pak para fillimit të pushimit të shtatorit për ndeshjet e përfaqësueseve, u bë e ditur se Liverpooli e kishte nxjerrë në shitje mesfushorin Wataru Endon, me largimin e tij të mundshëm në janar.
Endo është lënë jashtë listës së Liverpoolit për Ligën e Kampionëve dhe nuk ka luajtur asnjë minutë këtë sezon. Në një situatë të ngjashme gjendet edhe Federico Chiesa.
Chiesa ka përjetuar një periudhë shumë të vështirë në “Anfield”, e shoqëruar me probleme të vazhdueshme me lëndimet dhe formë të dobët që prej transferimit nga Juventusi në verën e vitit 2024.
I transferuar nga Arne Slot si një opsion i talentuar në krah, Chiesa pritej të kishte një rol të rëndësishëm në skuadrën e Liverpoolit. Megjithatë, 28-vjeçari ka shënuar vetëm pesë gola në 50 paraqitje për klubin.
Italiani ka përjetuar zhgënjim pas transferimit në Ligën Premier dhe pikërisht kur iu krijua mundësia për t’i treguar vlerat e tij nën drejtimin e një trajneri të ri, ai pësoi një lëndim në pjesën e poshtme të shpinës gjatë përgatitjeve parasezonale.
Chiesa është rikthyer në stërvitje këtë javë, por duket se Iraola tashmë e ka marrë një vendim për të.
Sipas mediumit italian Calcio Mercato, atij i është bërë e ditur se duhet të “bëjë gati valixhet”, nëse nuk arrin të hyjë në planet e Iraolas për ekipin e parë.
Ish-lojtari i Juventusit tashmë është lënë jashtë listës së Liverpoolit për Ligën e Kampionëve, njësoj si Endo. E njëjta gjë kishte ndodhur edhe sezonin e kaluar, përpara se Chiesa të përfshihej në listë pas lëndimit afatgjatë të mbrojtësit Giovanni Leoni në shtator./Kampionet/
