Como po vazhdon me ritëm të jashtëzakonshëm në Serie A. Skuadra e drejtuar nga Cesc Fàbregas mposhti Parmën 2-1 në shtëpi në javën e katërt dhe u ngjit në vendin e dytë të tabelës.
Por, pavarësisht fitores, vëmendjen e mediave italiane e mori një tjetër detaj: zëvendësimi i hershëm i Martin Baturinës.
Mesfushori kroat u largua nga loja në minutën e 55-të, vetëm katër ditë pasi kishte shkëlqyer në Ligën e Kampionëve ndaj RB Leipzigut, ku realizoi një gol dhe një asistim. Vendimi i Fàbregasit fillimisht habiti shumëkënd, pasi Baturina kishte qenë ndër lojtarët më të mirë të Comos edhe në këtë ndeshje.
Baturina po luante me ethe
Arsyeja e zëvendësimit, megjithatë, ishte më e pazakontë. Sipas raportimeve të mediave italiane, Baturina nuk ishte në gjendje të mirë fizike dhe po luante ndërsa vuante nga ethe dhe simptoma të ngjashme me gripin.
Orari i ngjeshur i ndeshjeve duket se kishte ndikuar te Como, ndërsa Fàbregas e kuptoi se skuadra po humbiste energjinë në pjesën e dytë. Trajneri spanjoll reagoi menjëherë me një zëvendësim të dyfishtë, duke mos dashur të rrezikonte gjendjen e lojtarëve të tij.
Madje, sipas raportimeve, Baturina kishte pasur edhe vështirësi në frymëmarrje, çka e bën edhe më të kuptueshëm vendimin për ta nxjerrë nga loja.
Shifrat tregojnë një tjetër histori
Pavarësisht gjendjes fizike, Baturina arriti të linte gjurmë edhe gjatë minutave që ishte në fushë. Ai përfundoi me 92 për qind pasime të sakta, krijoi një rast për gol, realizoi dy driblime nga dy tentativa, fitoi gjashtë topa dhe triumfoi në dy nga tri duelet në tokë.
Zëvendësimi i hershëm i tij, megjithatë, nuk është diçka e re për Fàbregasin. Baturina nuk ka luajtur më shumë se 66 minuta në asnjërën nga katër ndeshjet e para të Serie A-së këtë sezon.
Ndaj Udineses u zëvendësua në pushim, kundër Napolit në minutën e 58-të, ndaj Genoas në të 66-tën, ndërsa ndaj Parmës doli në minutën e 55-të.
Pra, ajo që në pamje të parë dukej si një vendim i çuditshëm i Fàbregasit, në fakt kishte një arsye shumë konkrete: Baturina po luante i sëmurë, ndërsa trajneri nuk deshi të rrezikonte një prej lojtarëve të tij kryesorë. /Kampionet/
