Roma vazhdon me ritëm perfekt në Serie A, duke regjistruar fitoren e katërt radhazi në po aq ndeshje të zhvilluara, pasi triumfoi 0-2 në udhëtim ndaj Torinos.
Skuadra e Gian Piero Gasperinit e nisi ndeshjen më kërkuese dhe pati disa mundësi për të kaluar në epërsi. Donyell Malen ishte protagonist i disa rasteve të mira, ndërsa në minutën e 23-të ai realizoi, por goli u anulua për pozicion jashtë loje.
Roma vazhdoi të këmbëngulte dhe në minutën e 40-të gjeti golin e avantazhit. Pas një topi të rikthyer brenda zonës, Donyell Malen reagoi shpejt dhe me një goditje të saktë e dërgoi topin në rrjetë për 0-1.
Torino u përpoq të reagonte pas pushimit dhe pati mundësi për të barazuar. Giovanni Simeone në minutën e 58-të u gjend në një pozitë të mirë brenda zonës, por goditja e tij u prit pa vështirësi nga Mile Svilar.
Roma ndërkohë menaxhoi mirë epërsinë dhe mbeti e rrezikshme në aksionet e saj. Në minutën e 70-të, Nahuel Molina lëshoi një goditje të fuqishme nga distanca, por Lucas Perri reagoi shkëlqyeshëm për ta ndalur dhe për ta mbajtur Torinon në lojë.
Vendasit tentuan deri në fund të gjenin golin e barazimit, por Roma ishte e sigurt në prapavijë dhe në minutat shtesë e vulosi fitoren.
Në minutën e 90+3-të, Niccolo Pisilli përfitoi nga një top i lirë brenda zonës dhe me një goditje të saktë në këndin e poshtëm të majtë shënoi për 0-2, duke i dhënë fund përfundimisht dilemës për fituesin.
Kështu, Roma e nis në mënyrën më të mirë kampionatin, me katër fitore në katër xhirot e para, duke treguar se skuadra e Gasperinit synon të jetë një prej protagonistëve kryesorë të këtij edicioni në Serie A. /Kampionet/
