Malisheva ka fituar me rezultat 2-0 në udhëtim te Prishtina e Re në ndeshjen e vlefshme për javën e 10-të në Albi Mall Superligën e Kosovës.
Ekipi i Qatip Osmanit është kthyer te fitorja pas dy humbjeve radhazi duke mposhtur Prishtinën e Re dhe duke ia thelluar krizën me gjashtë ndeshje pa fitore, nga to pesë humbje.
Pjesa e parë u karakterizua me lojë më të mirë të mysafirëve të cilët përveç rasteve arritën të shënojnë edhe dy gola.
Goli i parë i ndeshjes erdhi në minutën e gjashtë me anë të Altin Aliut, i cili shënoi për 0-1, ndërsa i njëjti lojtar shënoi edhe në minutën e 40-të për 0-2.
Në pjesën e dytë u zhvillua lojë më e barabartë nga të dyja skuadrat, por pa arritur ta gjejnë rrjetën dhe në fund ndeshja u mbyll me rezultatin e pjesës së parë.
Pas kësaj fitore, Malisheva ngjitet në pozitën e pestë me 13 pikë, ndërsa Prishtina e Re mbetet e fundit me 7 pikë.
Në ndeshjen e ardhshme, malishevasit e presin Ballkanin, teksa ekipi nga Hajvalia udhëton në Ferizaj. /Kampionet/
