Wayne Rooney ka zbuluar se ishte shumë afër t’i bashkohej një rivali të Manchester United në Ligën Premier, përpara se të kompletonte transferimin e tij të famshëm në “Old Trafford” nga Everton.
Sulmuesi iu bashkua “Djajve të Kuq” si një talent i jashtëzakonshëm 18-vjeçar dhe u shndërrua në një legjendë të klubit, duke luajtur 559 ndeshje dhe shënuar 253 gola, por gjërat mund të kishin marrë një rrjedhë krejt tjetër.
Rooney ishte një prej futbollistëve më të kërkuar në verën e vitit 2004, pas një sezoni të jashtëzakonshëm me Evertonin dhe paraqitjeve mbresëlënëse me Anglinë në Kampionatin Evropian në Portugali, përpara se një lëndim në këmbë t’i ndërpriste turneun.
Sulmuesi dorëzoi kërkesën për transferim nga Evertoni në fund të afatit kalimtar, dhe Manchester United arriti marrëveshjen për 27 milionë funte vetëm pak ditë më vonë.
Megjithatë, United nuk ishte i vetmi klub i interesuar, pasi Newcastle u përpoq ta siguronte firmën e tij, pavarësisht një telefonate nga legjenda e klubit, Alan Shearer, dhe trajneri ikonë, Sir Bobby Robson, i cili, megjithatë, ia shqiptoi gabim emrin Rooneyt të ri.
Ish-futbollisti zbuloi se do t’i ishte bashkuar “Laraskave” pasi ata kishin bërë një ofertë atë verë, por ajo ofertë në fakt e detyroi Manchester United të vepronte.
“Sigurisht që do të kisha shkuar te Neëcastle. Manchester United donte të priste edhe një sezon dhe më pas të më nënshkruante vitin pasues”.
“Newcastle bëri një ofertë dhe, po të mos kishte ndërhyrë Manchester United, do të kisha shkuar atje. Të dyja po konkurronin për mua”.
“Miku më i mirë i agjentit tim ishte kryetar i Newcastle në atë kohë. Jam i sigurt që po e shtynte për të më marrë gjithashtu”.
“Doja të shkoja te Manchester United, por gjithashtu fola me Sir Bobby Robson dhe Alan Shearer”, ka thënë Rooney./Kampionet/
