AS Roma ka regjistruar një fitore të rëndësishme në “Olimpico”, duke mposhtur Udinesen me rezultat 2-0, në ndeshjen e vlefshme për javën e 11-të të Serie A.
Skuadra e drejtuar nga Gian Piero Gasperini dominoi takimin dhe siguroi tri pikë të merituara falë një loje të disiplinuar dhe efikase.
Pjesa e parë nisi me iniciativë të Romës, e cila krijoi disa raste të mira, ndërsa Bryan Cristante goditi shtyllën në minutën e 30-të pas një goditjeje të fuqishme nga distanca.
Në minutën e 39-të, pas një ndërhyrjeje të dyshimtë me dorë nga Hassane Kamara, gjyqtari fillimisht la lojën të vazhdojë, por pas rishikimit në VAR akordoi penallti për Romën.
Nga pika e bardhë, Lorenzo Pellegrini u tregua i saktë, duke realizuar me qetësi në minutën e 42-të për epërsinë 1-0.
Në pjesën e dytë, Roma vazhdoi të kontrollonte lojën dhe në minutën e 61-të, Zeki Çelik dyfishoi rezultatin pas një kombinimi të bukur me Gianluca Mancinin. Turku tregoi qetësi brenda zonës dhe dërgoi topin në rrjetë për 2-0.
Udinese kishte një mundësi të artë për të ngushtuar rezultatin në minutën e 88-të me Arthur Attan, por goditja e tij u ndal në shtyllë. Deri në fund, Roma menaxhoi lojën me përvojë dhe ruajti epërsinë.
Pas kësaj fitoreje, Roma kap vendin e parë me 24 pikë, ku rrezikohet vetëm, nga Interi. /Kampionet/
