Real Madrid po kalon një sërë ndryshimesh të rëndësishme në nivel drejtues këtë vit dhe ‘Estadio Santiago Bernabeu’ nuk përbën përjashtim.
Klubi madrilen ka vendosur t’i japë stadiumit të tij një emër të ri zyrtar, megjithëse nuk bëhet fjalë për një ndryshim të madh në mënyrën se si ai është njohur tradicionalisht.
Presidenti Florentino Perez synon të modernizojë modelin e pronësisë së klubit dhe pritet të prezantojë ndryshimet e propozuara në sistemin e anëtarësisë javën e ardhshme, gjatë Asamblesë së Përgjithshme të Real Madridit.
Ky zhvillim vjen pas përfundimit të rinovimeve madhore të stadiumit vitin e kaluar. Klubi gjithashtu shpreson të ndërtojë një parkim nëntokësor të lidhur drejtpërdrejt me stadiumin dhe të riformojë stacionin e metrosë që e shërben atë. Megjithatë, projekti i parkimit është pezulluar përkohësisht, pas një ankese ligjore nga banorët lokalë.
Ndërkohë, siç ishte paralajmëruar që vitin e kaluar, Real Madrid ka bërë tashmë zyrtare ndryshimin e emrit të stadiumit: nga “Estadio de Santiago Bernabeu” në një version më të shkurtuar, “Bernabeu”.
Sipas raportimit të Diario AS, logoja e re me emrin e shkurtuar është shfaqur gjatë fushatave promocionale me NFL në këtë javë. Pikërisht ‘Bernabeu’ do të presë këtë të diel ndeshjen e parë të futbollit amerikan që luhet ndonjëherë në Spanjë, mes Ëashington Commanders dhe Miami Dolphins.
Ky ndryshim nuk është thjesht një riemërim, por simbolizon një frymë të re për stadiumin historik, i cili vazhdon të mbajë emrin e legjendës së klubit dhe ish-presidentit të tij të famshëm, ‘Santiago Bernabeu’.
Pas rinovimeve, stadiumi ofron tashmë një treg ushqimor modern, si dhe bare dhe ambiente mikpritjeje të reja, duke e shndërruar “Bernabeun” në një qendër të gjallë sportive dhe kulturore në zemër të Madridit./Kampionet/
