Paris Saint-Germaini ka shënuar fitore me rezultat 1-0 në shtëpi ndaj Nice në kuadër të javës së 11-të në elitën e futbollit francez.
Në minutën e 14-të vendasit e patën një super rast me Bradley Barcola, por goditjen e tij e priti për mrekulli portieri mysafir.
PSG-ja pati një tjetër rast në minutën e 38-të, kësaj radhe me Achraf Hakimin që po ashtu u ndal nga portieri i Nice.
Në pjesën e dytë të besuarit e Luis Enriques vazhduan ofensivën, por që mysafirët u treguan të durueshëm në fazën defensive duke arritur që të dalin të pamposhtur nga ‘Parc des Princes’.
Vitinha në minutën e 68-të tentoi të realizojë, por që ishte e kotë pasi portieri mysafir po priste çdo goditje që vinte në drejtim të tij.
Kur dukej se gjithçka tashmë ka marrë fund në skenë doli Goncalo Ramos, i cili në minutën e 94-të realizoi për t’i dhënë fitoren PSG-së me rezultat 1-0.
Pas këtij triumfi PSG-ja shkon në kuotën e 24 pikëve dhe ka katër më shumë se vendi i dytë Moanco që ka 20 sosh, por me një ndeshje më pak të luajtur.
Kampioni në fuqi i Evropës do të rikthehet sërish në aksion të martën, ku do të luajnë një përballje tejet të fortë ndaj Bayern Munichut në Ligën e Kampionëve./Kampionet/
