Sot po zhvillohen ndeshjet e fundit të fazës së grupeve të Kupës së Botës U-17, dhe statistikat nxjerrin një situatë të pazakontë.
Portieri më i vlerësuar i kampionatit deri tani ka pësuar plot 22 gola në tre ndeshje, por megjithatë mban një mesatare prej 8.37 në Sofascore.
Bëhet fjalë për Nicolas Kutran, portierin e Kaledonisë së Re, i cili ka bërë një punë mbresëlënëse përkundër numrit të lartë të golave të pësuar.
Ai ka realizuar 31 pritje, 23 prej të cilave brenda zonës 16-metërshe. Në fillim të kampionatit, Kutran priti 9 gjuajtje nga Portugalia në një humbje 6-1, ndërsa më pas me 8 pritje ishte vendimtar për barazimin sensacional 0-0 kundër Japonisë.
Raundi i fundit i fazës së grupeve ishte më i vështiri. Kundër Marokut, Kutran priti 14 gjuajtje, duke marrë një vlerësim prej 8.0 nga SofaScore, por kjo nuk mjaftoi për ta shpëtuar ekipin e tij, i cili humbi 16-0.
Maroku ishte padyshim favorit i madh, ndërsa Kaledonia e Re luajti me 9 lojtarë që nga minuta e 31-të pas dy kartonëve të kuq.
Edhe pse Kaledonia e Re nuk ka një histori të gjatë në futbollin botëror — është anëtare e FIFA-s që nga viti 2004 — ekipi i saj po shënon përparim të dukshëm.
Ata kanë marrë pjesë më parë në Kupën e Botës U-17 në vitet 2017 dhe 2023, dhe e vetmja pikë deri më tani erdhi nga barazimi 1-1 me Japoninë në vitin 2017.
Për Kupën e Botës 2026, Kaledonia e Re, si skuadra e dytë më e mirë nga Oqeania, pret një kundërshtar në kualifikueset ndërkontinentale.
Pavarësisht statusit të saj në FIFA, Kaledonia e Re nuk është një shtet i pavarur, por territor francez në Oqeanin Paqësor jugperëndimor, rreth 1,200 kilometra në lindje të Australisë, me një popullsi prej rreth 270,000 banorësh. /Kampionet/
