Lajm i mirë për Manchester United, pasi arkat e klubit anglez do të rriten me jo më pak se 44 milionë euro. Arsyeja është shitja e pritshme e sulmuesit danez Rasmus Hojlund, i cili vetëm pak muaj pas mbërritjes te Napoli ka bindur drejtuesit italianë ta blejnë përfundimisht kartonin e tij.
Sipas gazetës britanike Mirror, Manchester United i ka dhënë dritën jeshile Napolit për të aktivizuar opsionin e blerjes në afatin kalimtar të janarit. Hojlund iu bashkua kampionëve të Italisë në formë huazimi gjatë verës, ku shpërtheu menjëherë me katër gola në gjashtë ndeshje, përpara se një dëmtim ta ndalonte përkohësisht.
Napoli është plotësisht i bindur për potencialin e 22-vjeçarit dhe nuk dëshiron të presë deri në fund të sezonit. Klubi italian synon të aktivizojë klauzolën e lirimit prej 44 milionë eurosh që në janar, me palët që tashmë janë në bisedime të avancuara për ta finalizuar marrëveshjen.
Mësohet se në rast se skuadra e Antonio Contes kualifikohet për Ligën e Kampionëve, blerja do të bëhet automatikisht e detyrueshme, duke i garantuar United një përfitim të sigurt financiar.
Kujtojmë se Manchester United e bleu Hojlundin në vitin 2023 nga Atalanta Bergamo për afro 78 milionë euro, por sulmuesi danez nuk arriti të përshtatej plotësisht në “Old Trafford” dhe mbeti larg pritshmërive.
Tashmë, aventura italiane duket se po i rikthen besimin dhe formën e munguar. Për Napolin, Hojlund shihet si një investim strategjik për të ardhmen, ndërsa për United kjo shitje përfaqëson një mundësi për të balancuar financat dhe për të hapur rrugën drejt përforcimeve të reja në sulm. /Kampionet/
