I quajtur dikur pasardhësi i Peles, Robinho tani po vuan një dënim prej nëntë vitesh burg në burgun e Tremembes.
Braziliani Robinho pati një udhëtim të çuditshëm, nga Real Madridi te Manchester City dhe Milani, por i shkatërroi të gjitha për shkak të përdhunimit që kreu me disa persona të tjerë në Itali në vitin 2022.
Apeli i ri i Robinhos u refuzua së fundmi dhe ai do të vazhdojë të vuajë dënimin me burg, ndërsa ish-futbollisti ende pretendon se ka prova të mjaftueshme për të vërtetuar pafajësinë e tij.
“Ne patëm një lidhje të shkurtër dhe sipërfaqësore. Shkëmbyem puthje dhe pastaj shkova në shtëpi. Kishte edhe njerëz të tjerë atje. Kur pashë që ajo donte të vazhdonte me djem të tjerë, shkova në shtëpi. Nuk e mohova kurrë. Ishte konsensuale. Nuk e mohova kurrë. Mund ta mohoja sepse ADN-ja ime nuk është aty. Por unë nuk jam gënjeshtar”, ka thënë fillimisht Robinho në një intervistë me TV Record.
Këshilli i Komunitetit Taubate, një organizatë jofitimprurëse e themeluar nga gjyqtarja Sueli Zeraik për të mbështetur gjyqësorin, publikoi një video në të cilën Robinho mohon të ketë ndonjë privilegj ose të ketë marrë trajtim të ndryshëm nga të burgosurit e tjerë.
“Dieta ime, orari im i gjumit, gjithçka është e njëjtë me të burgosurit e tjerë. Nuk kam ngrënë kurrë diçka ndryshe, nuk jam trajtuar kurrë ndryshe. Kur është koha për punë, bëj gjithçka që bëjnë të burgosurit e tjerë. Nëse duam të luajmë futboll, lejohet të dielave, kur nuk ka punë”, shpjegoi 41-vjeçari.
“Unë kurrë nuk kam pasur privilegje. Vizitat janë të shtunave ose të dielave. Kur gruaja ime nuk vjen vetëm, ajo vjen me fëmijët e mi. Më i madhi luan, dhe dy më të vegjlit mund të vijnë gjithashtu. Vizitat janë të njëjta, dhe trajtimi është i njëjtë për të gjithë”, përfundoi ish-ylli brazilian.
Sipas gaztës Marca, burgu në Tremembe është “shtëpia e re” e shumë politikanëve, personazheve të famshëm dhe vrasësve të njohur. /Kampionet/
