Exequiel Zeballos, djali nga La Banda i Santiago del Estero, ka treguar se përkushtimi dhe pasioni mund të tejkalojnë çdo pengesë.
Nga udhëtimet e gjata me autobus, përballjet me lëndimet e deri tek goli historik kundër River Plate, Zeballos ka shkruar një kapitull të ri në historinë e Boca Juniors.
Ëndrra filloi në La Banda
I lindur në vitin 2002, Zeballos u rrit në një zonë ku futbolli nuk ishte thjesht një lojë, por një mënyrë jetese. Në fusha me dhe të pluhurosura, ai la gjurmën e parë të talentit të tij, duke tërhequr vëmendjen e skautëve të Boca Juniors që kur ishte vetëm 11 vjeç.
Ëndrra për të luajtur në Bombonera ishte e qartë, por sfida ishte distanca: afër 20000 kilometra larg Buenos Airesit.
Çdo fundjavë, ai udhëtonte më shumë se 12 orë me autobus për të luajtur me ekipin e tij të preferuar. Kur kishte 13 vjet, Boca hapi dyert e konviktit të shkollës së saj, duke i mundësuar të stërvitej çdo ditë dhe të jetonte ëndrrën e tij.
Debutimi dhe lëndimet
Në moshën 18-vjeçare, Zeballos debutoi për Boca Juniors, duke treguar menjëherë talentin dhe guximin e tij. Por rruga nuk ishte e lehtë: një dëmtim i tibisë e la jashtë fushës për 162 ditë, e më pas lëndime të tjera në menisk dhe ligamente të kryqëzuara provuan durimin dhe vendosmërinë e tij.
Për Zeballos, lindja e vajzës së tij ishte dritë shprese, që i riktheu motivimin dhe ekuilibrin. Me rikthimin e fundit, ai mori fanellën me numër 7, të njëjtën që mbante ikona Martín Palermo.
Magjia në Superclásico
Momenti më i madh erdhi në Superclásico kundër River Plate (2-0). Në “Bombonera” të mbushur plot tifozë, Zeballos tregoi aftësitë e tij: pas dy gjuajtjesh, topi përfundoi në rrjetën e River Plate.
La Bombonera shpërtheu në festë – djali nga La Banda kishte bërë magji në stadiumin e ëndrrave të tij.
Exequiel Zeballos nuk është vetëm një lojtar premtues, por një shembull i përkushtimit dhe pasionit që e çon ëndrrën deri në realitet. Superclásico u mbush me Azul y Oro dhe tifozët tashmë këndojnë: “Baila Changuito!”. /Kampionet/
