Manchester Unitedi i ka dhënë fund rezultatit negativ të Nottingham Forest, që s’dinin për pikë në katër ndeshjet e fundit, duke ndarë pikët në përballjen 2-2.
Një prej tre skuadrave që fituan të gjitha ndeshjet e tetorit, United e nisi mirë takimin dhe Benjamin Sesko pati dy raste të mira në 15 minutat e para, por goditjet e tij përfunduan jashtë kuadratit.
Pas një aksioni të bukur, Matz Sels ndali mrekullisht goditjen e Amad Diallo, por pak më vonë një goditje këndi e diskutueshme i dha mundësinë Casemiros të shënonte me kokë golin e parë – duke arritur kontributin e tij të pestë në tetë paraqitje kundër Forest.
Tentativa e gjatë e Callum Hudson-Odoi afër fundit të pjesës së parë përmbledhi më së miri performancën e dobët të vendasve, ndërsa Luke Shaw dhe Matthijs de Ligt bënë një paraqitje solide në mbrojtje për United.
Pjesa e dytë nisi ndryshe, me një periudhë presioni të fortë të Forest që dha rezultat të menjëhershëm: në harkun e vetëm prej 92 sekondave, ata përmbysën gjithçka.
Fillimisht Morgan Gibbs-White shënoi me kokë pas krosimit të Ryan Yates, dhe më pas Nicolo Savona përfitoi nga një mbulim i dobët në zonë për të dërguar topin në rrjetë për golin e dytë.
Skuadra e Ruben Amorim reagoi, dhe kapiteni Bruno Fernandes ishte pranë golit kur goditja e tij u përplas në shtyllë. Hudson-Odoi rrezikoi sërish për vendasit me një depërtim dhe goditje të fortë, por Forest nuk arriti ta mbyllte ndeshjen. United e shfrytëzoi këtë, dhe pas një goditjeje këndi që nuk u largua siç duhet, Amad Diallo realizoi me një vollej të fuqishme për 2-2.
Në minutat e fundit të ndeshjes të dy ekipet patën shanset e tyre për ta fituar takimin, por ndërhyrja vendimtare e Murillo që bllokoi në vijën e golit goditjen e Amad Diallo ruajti barazimin.
Unitedi renditet në pozitën e pestë me 17 pikë derisa Nottingham qëndron në vendin e 18-të me gjashtë sosh./Kampionet/
