Llapi është ndalur me barazim 1-1 në shtëpi nga Prishtina e Re në ndeshjen e vlefshme për javën e 13-të në Albi Mall Superligën e Kosovës.
Ekipi i Tahir Batatinës nuk ka arritur të kthehet te fitorja në kampionat, pasi nuk ka shfrytëzuar terrenin vendas për të mposhtur ekipin nga Hajvalia.
Pjesa e parë e ndeshjes u karakterizua me raste nga të dyja ekipet, por vetëm mysafirët arritën ta gjejnë rrugën e rrjetës.
Goli i vetëm në këtë pjesë erdhi në minutën e 14-të me anë të Elvis Prençit, i cili shënoi për epërsinë e mysafirëve 0-1.
Në pjesën e dytë, Llapi u hodh i gjithi në sulm krijoi shumë raste në kërkim të rezultatit, por arriti vetëm një herë ta tund rrjetën.
Goli i vetëm në këtë pjesë erdhi në minutën e 51-të me anë të Arianit Hasanit, i cili shënoi për 1-1 dhe me këtë rezultat u mbyll ndeshja duke bërë që të dy ekipet të ndajnë pikët.
Pas këtij barazimi, Llapi e sheh vetëm në pozitën e gjashtë me 17 pikë, teksa Prishtina e Re renditet e fundit me nëntë pikë.
Në ndeshjen e ardhshme pas pushimit ndërkombëtar, Llapi udhëton te Ballkani, teksa Prishtina e Re e pret Dritën. /Kampionet/
