Drejtuesit e Liverpoolit raportohet se kanë marrë një vendim në lidhje me të ardhmen e Arne Slot pas humbjes 3-0 të “Të Kuqve” ndaj Crystal Palace në raundin e katërt të Carabao Cup.
Një skuadër e Liverpoolit me shumë ndryshime, ku debutuan Freddie Woodman dhe Kieran Morrison, pësoi një tjetër disfatë ndaj skuadrës së Oliver Glasner, Crystal Palace, të mërkurën.
Klubi nga jugu i Londrës regjistroi fitoren e tretë ndaj Liverpoolit këtë sezon, pasi i kishte mposhtur edhe në Community Shield dhe në Ligën Premier.
Kjo humbje ishte e gjashta për Liverpoolin në shtatë ndeshjet e fundit, me fitoren e vetme në këtë periudhë që erdhi me rezultatin 5-1 kundër Eintracht Frankfurt në Ligën e Kampionëve.
Kështu, me Liverpoolin jashtë Carabao Cup dhe duke mbetur prapa Arsenalit në garën për titull në Ligën Premier, po shtrohen pyetje për Slot dhe skuadrën e tij, pavarësisht se trajneri holandez ende gëzon “kredi” pas titullit të fituar në sezonin e tij të parë si trajner.
Arne Slot
Nëse rezultatet nuk ndryshojnë, presioni do të vazhdojë të rritet lidhur me pozicionin e Slot, me gazetarin Fabrizio Romano që ka zbuluar atë që di për ndjenjat e drejtuesve të Liverpoolit rreth situatës aktuale, gjatë një paraqitjeje në kanalin e tij në YouTube.
“Liverpooli absolutisht, brenda klubit… dhe kur them brenda, nënkuptoj hierarkinë, pronarët, të gjithë njerëzit në klub, vërtet, vërtet besojnë te Arne Slot”.
“Ata janë 100 për qind të bindur se Arne Slot është trajneri më i mirë për ta menaxhuar këtë situatë”.
“Sigurisht, ka qenë një fillim i dobët sezoni, por Liverpooli është i bindur se gjithçka do të jetë në rregull, se do të duhet pak kohë për të vlerësuar skuadrën me blerjet e reja, për të ndryshuar diçka dhe për t’u rikthyer te qëndrimi i sezonit të kaluar”.
“Por Liverpooli ka besim të plotë te Slot. Ka një komunikim shumë të mirë të përditshëm mes drejtorëve, të gjithë njerëzve në klub në drejtim dhe Arne Slot”, ka thënë Romano./Kampionet/
