Momenti i Liverpoolit në Ligën Premier vazhdon të jetë sfidues, edhe pas fitores në Ligën e Kampionëve kundër Eintracht Frankfurt. Edhe pse fituan bindshëm në Evropë gjatë javës, Reds pësojnë humbje në Ligën Premier ndaj Brentfordit me rezultat 3-2, duke treguar se ende nuk e kanë kaluar momentin e vështirë.
Pas humbjeve kundër Crystal Palace, Chelsea dhe Manchester United, Liverpool nuk ka arritur të marrë pikë edhe këtë herë në udhëtimet e tyre londineze.
Tre transfertat radhazi në kryeqytet kanë qenë “shkatërruse”, duke treguar një sezon që nuk ka nisur ashtu siç pritej, pavarësisht përforcimeve të mëdha së verës.
Këto statistika nuk përputhen me skuadrën që admironte gjithë bota vetëm disa muaj më parë, e cila kishte fituar Ligën Premier dhe kishte arritur finalen e Kupës së Ligës.
Megjithatë, mes një lideri që duhet të rikthehet dhe një faze mbrojtëse që lë shumë për të dëshiruar, Liverpool zbriti në vendin e gjashtë në renditje dhe duket larg ëndrrave për titull, që pak muaj më parë dukeshin të arritshme.
Ku është “clean sheet” i Liverpoolit?
Edhe pse Liverpooli kishte arritur 5 fitore radhazi në 5 ndeshjet e para, tashmë kishte shfaqur shenja se mbrojtja nuk është e pamposhtur si sezonin e kaluar.
Në vetëm 9 ndeshje, skuadra ka pësuar 14 gola, së pari me Alisson dhe më pas me Mamardashvili, duke treguar se është e vështirë të mbash portën e paprekur.
Në 9 ndeshjet e fundit në tri gara, Liverpool ka pësuar të paktën një gol në secilën.
Një tjetër problem janë humbjet. Liverpool ka humbur 4 ndeshje në 9 takime, një numër që barazon gjithashtu shifrat e sezonit të kaluar, por për atë ishte e nevojshme të luhej 38 ndeshje.
Për të gjetur një moment të ngjashëm në histori duhet të kthehemi në shkurt 2021, kur Liverpool pësoi 4 humbje radhazi në kampionat. /Kampionet/
