Një nga ikonat më të mëdha të futbollit finlandez, Teemu Pukki, ka konfirmuar zyrtarisht se po i thotë lamtumirë ekipit kombëtar dhe po tërhiqet si golashënuesi më i mirë në histori me 42 gola.
35-vjeçari Teemu Pukki do të mbahet mend si golashënuesi më i mirë i ekipit kombëtar finlandez në histori dhe njëri nga më meritorët që e vendosi Finlandën midis elitës së futbollit evropian dhe e udhëhoqi atë në Kampionatin Evropian.
Në konferencën e sotme për shtyp, Pukki konfirmoi zyrtarisht se po i thotë lamtumirë ekipit kombëtar. Dy duelet e radhës në kualifikueset për Kupën e Botës do të jenë të fundit të tij me fanellën e Finlandës.
“Më pëlqeu shumë dhe jam krenar që munda ta bëj këtë për kaq gjatë. Madje shënova disa gola”, tha fillimisht Pukki me një ton shakaje.
Pasi për vite me radhë e ka fituar statusin e legjendës për ekipin anglez Norwch City, ai tani është kthyer në vendin e tij dhe luan për HJK Helsinki.
“Kampionati Evropian ishte një përvojë e shkëlqyer. Çdo ndeshje në të cilën mora pjesë kishte momente të shkëlqyera. Disa vite ishin të vështira për ekipin kombëtar, por vitet e para nën drejtimin e trajnerit Markku Kanerva ishin të mira”, shtoi finlandezi.
Sipas Pukkit, karriera e tij nuk ka mbaruar dhe ai do të vazhdojë në nivelin e klubit te HJK Helsinki, të paktën për një sezon tjetër. /Kampionet/
