Mateo Kovacic, i cili deri më tani nuk ka arritur të lërë gjurmë të thella këtë sezon me Manchester Cityn, mund të bëhet një nga emrat më të përfolur në afatet e ardhshme të transferimeve.
Mesfushori kroat po sheh gjithnjë e më shumë rolin e tij të kufizuar nën drejtimin e Pep Guardiolës, dhe kjo ka hapur mundësinë për një lëvizje të re në karrierë.
Sipas mediave britanike, AC Milan është një nga klubet e interesuara për ta rikthyer Kovacicin në Serie A. Kuqezinjtë po vlerësojnë mundësinë për ta ribashkuar 31-vjeçarin me bashkëkombësin e tij Luka Modric, nëse ky i fundit transferohet në “San Siro” në fund të sezonit. Ideja e Milanit është të përfitojë nga përvoja dhe stabiliteti që do të sillnin dy mesfushorët kroatë, duke i shtuar thellësi një skuadre që synon rikthimin në majat e Evropës.
Megjithatë, Milan nuk është i vetmi klub që ka shprehur interes për Kovacicin. Sipas portalit CaughtOffside, përveç italianëve, edhe Aston Villa dhe West Ham United po e mbajnë nën vëzhgim situatën e tij. Të dy klubet angleze e shohin ish-lojtarin e Real Madridit si një përforcim me përvojë për mesfushën e tyre, sidomos në prag të pjesës së dytë të sezonit kur rotacioni bëhet vendimtar.
Në “Etihad Stadium”, situata e Kovacicit mbetet e paqartë. Ai ka qenë më shumë në hije, shpesh i përdorur si zëvendësues ose në ndeshje dytësore, dhe nuk ka arritur të sigurojë një vend të përhershëm në formacionin bazë.
Për këtë arsye, drejtuesit e Cityt janë të hapur të dëgjojnë oferta nëse vjen një propozim i përshtatshëm financiar. /Kampionet/
