Pas shkarkimit të Igor Tudor pas tetë ndeshjeve pa fitore në të gjitha garat dhe humbjes 1-0 ndaj Lazios në “Olimpico”, drejtuesit e Juventusit kanë nisur menjëherë kërkimin për trajnerin e ri.
Luciano Spalletti, ish-trajner i kombëtares italiane dhe fitues i titullit me Napolin, është kandidati kryesor që pritet të marrë drejtimin e “Zonjës së Vjetër”.
Megjithatë, emërimi i tij nuk është aq i thjeshtë. Spalletti ruan një lidhje të veçantë me Napolin – lidhje që e ka shprehur përmes dy tatuazheve të përhershme që mund të shkaktojnë polemika të forta në Torino.
Luciano Spalletti
Tatuazhi i parë, i realizuar pas triumfit historik në Serie A në vitin 2023, paraqet stemën e Napolit të gdhendur mbi një scudetto me flamurin italian dhe numrin “3”, duke simbolizuar tre titujt kampion të klubit.
I dyti tregon një Fiat Panda – makina që Spalletti përdorte shpesh në Napoli – e shoqëruar me malin Vezuv dhe mbishkrimin “Burra të fortë, fate të forta”, një shprehje që e identifikon me qytetin jugor dhe karakterin e tij.
Për një klub si Juventusi, që ka një rivalitet të ashpër dhe historik me Napolin, këto detaje nuk janë aspak të parëndësishme. Disa tifozë tashmë kanë shprehur kundërshtime në rrjetet sociale, duke vënë në dyshim nëse Spalletti do të mund të fitojë menjëherë zemrat e publikut bardhezi.
Tatuazhi i Luciano Spallettit
Në këtë situatë, drejtuesit e Juventusit ndodhen përballë një dileme: të besojnë tek përvoja dhe karizma e një trajneri që ka fituar gjithçka në Itali, apo të kërkojnë një figurë më të pranueshme për tifozët e tyre. /Kampionet/
