Rusia ka paraqitur një ofertë befasuese për të pritur Kampionatin Evropian të vitit 2032, pavarësisht se mbetet e pezulluar nga UEFA dhe FIFA që prej vitit 2022, për shkak të agresionit ushtarak ndaj Ukrainës.
Kjo mundësi u hap pas vështirësive serioze të Italisë në përgatitjen e infrastrukturës për garën, e cila aktualisht është planifikuar të organizohet së bashku nga Italia dhe Turqia.
Italia po përballet me vonesa të mëdha në projektet e rinovimit të stadiumeve kryesore — San Siro në Milano dhe Olimpico në Romë.
Ndërtimi i stadiumit të ri në Milano, që parashikohet të zëvendësojë San Siron, ende nuk ka marrë miratimin përfundimtar, ndërsa punimet në Romë ecin shumë më ngadalë se sa pritej.
Në këtë situatë, presidenti i Federatës Ruse të Futbollit, Alexander Djukov, ka deklaruar se Rusia është e gatshme të marrë përsipër organizimin në rast se Italia tërhiqet ose dështon.
“Italia ka probleme serioze me stadiumet. Nëse e humbasin organizimin, ne jemi gati. Rusia mund të presë Kampionatin Evropian 2032”, u shpreh Djukov.
Presidenti i UEFA-s, Aleksander Ceferin, e ka pranuar publikisht se Italia aktualisht ka infrastrukturën më të dobët ndër vendet kryesore evropiane, duke ngritur pikëpyetje për gatishmërinë e saj në pritjen e turneut.
Situata mbetet e paqartë, pasi Rusia është ende e përjashtuar nga të gjitha garat ndërkombëtare që prej vitit 2022.
Ceferin telegrafi.com
Nëse UEFA do ta konsiderojë seriozisht ofertën e saj, do të ishte një precedent i paprecedentë: një vend i pezulluar nga aktivitetet futbollistike që kërkon të organizojë një garë madhore pa pjesëmarrjen e ekipit të vet kombëtar.
Megjithatë, kthimi i Rusisë në strukturat e UEFA-s dhe FIFA-s nuk duket i mundshëm në një të ardhme të afërt. /Kampionet/
