E ardhmja afatgjatë e mbrojtësit Eric Garcias në Barcelonë është pothuajse e siguruar, me negociatat për rinovimin e kontratës deri në vitin 2030 që po ecin me ritëm të mirë dhe pritet të përfundojnë në javët e ardhshme.
Sipas raportimeve nga “Esports RAC1”, klubi dhe lojtari janë plotësisht në një linjë, me vetëm disa detaje të vogla që mbeten për t’u finalizuar.
Mbrojtësi 24-vjeçar, i cili aktualisht është i lidhur me kontratë deri në vitin 2026, është shndërruar në një shtyllë të formacionit të Hansi Flick, duke qenë titullar në 10 nga 13 ndeshjet e këtij sezoni dhe duke udhëhequr mbrojtjen përkrah talentit të ri Pau Cubarsi.
Falë qetësisë, fleksibilitetit dhe lidershipit, Garcia është bërë i pazëvendësueshëm në një periudhë me shumë mungesa për katalunasit, gjë që e ka shtyrë klubin të veprojë shpejt për të shmangur interesin e ekipeve si Chelsea.
Eric Garcia
Ky rinovim pritet të shpërblejë paraqitjet e tij mbresëlënëse dhe të vulosë rolin e Garcias si një element kyç në projektin e rindërtimit të Flick, duke siguruar që produkti i La Masias të mbetet në “Camp Nou” gjatë viteve më të mira të karrierës së tij.
Kujtojmë, Garcias iu tregua dera gjatë periudhës kur Xavi Hernandez ishte në krye, si dhe ishte afër kalimit te skuadra italiane Como, por situata ka ndryshuar për mirë për spanjollin./Kampionet/
