Alejandro Garnacho është paralajmëruar se disa aspekte të lojës së tij nuk janë në nivelin e duhur për një klub të madh si Chelsea apo Manchester United.
21-vjeçari u transferua këtë verë nga ‘Old Trafford’ në ‘Stamford Bridge’ dhe ndonëse ka treguar shkëndija cilësie në skuadrën e Enzo Marescas deri tani, kritikët e tij mendojnë se në lojën e argjentinasit ende ka mangësi të dukshme.
Ish-sulmuesi i Manchester United, Lee Sharpe, beson se vendimmarrja e Garnachos nuk është në nivelin e kërkuar për elitën.
Ai e vlerësoi teknikisht, fizikisht dhe për aftësinë për të ndezur ndeshjet me talentin e tij, por theksoi se lojtari duhet të përmirësohet ndjeshëm për t’u bërë më i kompletuar.
“Me Alejandro Garnachon është gjithmonë e njëjta gjë. Problemi i tij ka qenë dhe mbetet vendimmarrja në zonën e fundit të fushës. Sa i përket aftësive teknike, shpejtësisë dhe mënyrës se si ngre publikun në këmbë, ai është i jashtëzakonshëm”.
Alejandro Garnacho
“Por ndonjëherë tenton të gjuajë kur duhet të pasojë dhe anasjelltas, ngec në situata të vogla dhe kjo ndoshta nuk është në nivelin që kërkojnë klubet e mëdha si Manchester United apo Chelsea”.
“Nëse kjo është diçka që përmirësohet me moshën dhe përvojën, nuk e di. Ai ka disa vite tashmë në Ligën Premier dhe do të prisje që të kishte evoluar në këto aspekte, por nuk mendoj se ka ndodhur ende”, ka thënë Sharpe.
Me Garnachon që nuk ka angazhime me kombëtaren e Argjentinës këtë muaj, ish-ylli i United shpreson të jetë titullar për Chelsean në ndeshjen e së shtunës në shtëpi kundër Wolves, skuadrës që ndodhet në fund të tabelës së Ligës Premier./Kampionet/
