Zlatan Ibrahimovic luajti dhe fitoi trofe në pothuajse çdo ligë të madhe evropiane. Pas përfundimit të karrierës së tij, suedezi legjendar u kthye pas në përvojën e tij të pasur dhe krahasoi stilet e futbollit në vendet ku luajti.
Ai e filloi karrierën e tij në Malmo të Suedisë, dhe më pas u afirmua te Ajaxi. Shpejt ai mbërriti në Itali, fillimisht te Juventusi, pastaj te Interi dhe më pas te Milani.
Ibra luajti gjithashtu për Barcelonën, Paris Saint-Germain, Manchester United dhe së fundmi për LA Galaxy, përpara se të kthehej në Milani dhe ta përfundonte karrierën e tij atje.
Të gjitha këto kultura të ndryshme futbolli, thotë Ibrahimovic, i dhanë atij një perspektivë unike mbi ndryshimet midis ligave më të mëdha evropiane.
“Në Spanjë, atyre u pëlqen të luajnë, të ndërtojnë një sulm nga mbrojtja. Edhe nëse ekipet nuk janë më të fortat, ata gjithmonë përpiqen të luajnë futboll”, tha Ibrahimovic në podkastin Hot Ones, duke komentuar stilin e lojës në La Liga.
Ai kaloi vetëm një sezon në Spanjë, për shkak të një konflikti me Pep Guardiolën, dhe Ibra e njohu më së miri futbollin italian, ku kaloi pjesën më të madhe të karrierës së tij dhe veshi fanellat e tre klubeve më të mëdha – Juventus, Inter dhe Milan.
“Futbolli italian është shumë taktik dhe i studiuar në detaje. Mbrojtja është më e rëndësishme se sulmi. Është shumë e vështirë për një sulmues sepse kundërshtarët janë të përqendruar në mbrojtje, por kur arrin të thyesh atë mur dhe të shënosh një gol, ndjesia është e pabesueshme”, shpjegoi suedezi.
Ai përmendi gjithashtu në mënyrë të veçantë Ligën Premier, ku luajti për Manchester United.
“Në Angli, gjithçka ndodh me një shpejtësi të pabesueshme, si në sulm ashtu edhe në mbrojtje. Kjo është arsyeja pse, edhe nëse teknikisht je një lojtar i nivelit të lartë, nëse nuk mund ta përballosh atë ritëm, nuk do të kesh sukses, pavarësisht talentit tënd”, përfundoi 44-vjeçari. /Kampionet/
