Përzgjedhësi i Kombëtares së Kosovës, Franco Foda, ka dalë sot në konferencë për media në ditën e parë të grumbullimit të Dardanëve, para dy ndeshjeve të fundit të ciklit kualifikues për Kampionatin Botëror 2026, kundër Sllovenisë dhe Zvicrës.
Dardanët do të përballen me Slloveninë më 15 nëntor në Lubjanë, derisa tre ditë më vonë presin Zvicrën në Fadil Vokrri.
Foda foli për përgatitjet, gjendjen e skuadrës dhe pritjet për dy sfidat vendimtare të nëntorit, duke u ndalur edhe te çështja e dy futbollistëve që janë përfolur së fundmi për një mundësi të përfaqësimit me Kosovën – portierit Diant Ramaj dhe sulmuesit të talentuar Arjon Ibrahimovic. Dyshja luajnë në Heidenheim.
“Në parim, është e rëndësishme të flasim për futbollistët që janë aktualisht pjesë e Kombëtares së Kosovës. Megjithatë, për t’iu përgjigjur pyetjes suaj, po – kemi pasur kontakt me Ramajn dhe Ibrahimovicin,” u shpreh Foda.
“Ibrahimovic tani është ftuar nga Gjermania U21, por kjo nuk përjashton mundësinë që në të ardhmen të luajë për Kosovën, pasi jemi në komunikim”.
“Për momentin, duhet të përqendrohemi te futbollistët që janë këtu dhe te këto dy ndeshje që na presin, të cilat janë shumë të rëndësishme. Pastaj, do të shohim se si do të zhvillohen gjërat me këta dy futbollistë,” përfundoi përzgjedhësi gjerman i Dardanëve.
Kosova futet në dy ndeshjet e fundit me 7 pikë në vendin e dytë, ku kërkon minimalisht play-offin. /Kampionet/
