Drenica ka fituar me rezultat 2-0 në shtëpi ndaj Ballkanit në ndeshjen e vlefshme për javën e 13-të në Albi Mall Superligën e Kosovës.
Ekipi i Bylbyl Sokolit ka vazhduar serinë pozitive në kampionat duke mposhtur Ballkanin dhe duke marrë edhe fitoren e dytë nga tri ndeshjet e fundit, ku ka edhe një barazim.
Pjesa e parë e ndeshjes u karakterizua me lojë të hapur dhe shumë raste nga të dyja skuadrat, por portierët ishin në formë duke mohuar golin dhe pjesa e parë u mbyll me rezultat 0-0.
Në pjesën e dytë, vendasit ishin më të rrezikshëm duke konkretizuar rastet dhe duke shënuar dy gola për tri pikë të mëdha.
Goli i parë i ndeshjes erdhi në minutën e 65-të me anë të Udoyen Akpan, i cili shënoi për 1-0, ndërsa Kreshnik Uka (68’) u përkujdes për epërsinë 2-0.
Deri në fund pati edhe disa raste nga të dyja skuadrat, por shifrat nuk ndryshuan dhe Drenica mori një fitore të madhe me rezultat 2-0.
Pas kësaj fitore, Drenica e sheh veten në pozitën e katërt me 18 pikë, ndërsa Ballkani mbetet i dyti me 23 pikë.
Në ndeshjen e ardhshme pas pushimit ndërkombëtar, drenicasit udhëtojnë te Dukagjini, teksa therandasit e presin Llapin. /Kampionet/
