Milani ka luajtur baras me rezultat 2-2 ndaj Pisas në kuadër të javës së tetë në Serie A.
Vendasit kaluan në epërsi në minutën e shtatë falë një super goli të shënuar nga Rafael Leao për rezultatin 1-0.
Në minutën e 46-të të ndeshjes Matteo Tramoni i mysafirëve pati një rast ideal për të barazuar shifrat, por goditja e tij përfundoi pak centimetra mbi traversë.
Pisa ia doli që të barazojë rezultatin eventualisht në minutën e 60-të përmes Juan Cuadrados i cili u tregua i saktë nga penalltia për 1-1.
Milani pati një rast të artë për të rikthyer avantazhin, por Leao në minutën e 64-të ishte i pafat kur goditja e tij u përplas në traversë.
‘Rossonerët’ patën një tjetër mundësi shënimi në minutën e 70-të me anë të Alexis Saelemaekers, por portieri mysafir bëri një pritje fantastike për t’ia mohuar golin.
Mysafirët ia dolën që të shkaktojnë befasinë në minutën e 86-të, kur M’Bala Nzola u gjend i vetëm përballë Mike Maignan duke realizuar për rezultatin 2-1.
Ky gol mobilizoi Milanin që u vunë menjëherë në sulm për golin e barazimit dhe atë e gjetën në minutën e 93-të me Zachary Athekame që shënoi një gol fantastik për 2-2 pas asistimit nga Luka Modric.
Pas kësaj barazimi Milani shkon në kuotën e 17 pikëve dhe aktualisht është lider, të paktën deri pas përfundimit të ndeshjeve që do të zhvillohet gjatë vikendit./Kampionet/
