Çdo ndeshje që luhet sot në Evropë apo në botë bie në plan të dytë, pasi sytë e të gjithë dashamirëve të futbollit janë drejtuar nga Madridi.
Në “Santiago Bernabeu”, nga ora 16:15, zhvillohet përballja më e madhe e futbollit botëror, El Clasico, ku Real Madridi pret Barcelonën.
Kjo është përplasja e dy botëve, dy filozofive të ndryshme dhe dy klubeve që ndajnë miliona tifozë në të gjithë planetin. Dueli i sotëm vjen në një moment kur të dyja skuadrat ndajnë kreun e tabelës në La Liga, Reali i pari me 24 pikë, dy më shumë se kampionët në fuqi, Barcelona.
Reali më i qetë, Barcelona me mungesa të shumta
Skuadra e Xabi Alonsos e pret ndeshjen në një atmosferë më të qetë dhe me një grup më të plotë lojtarësh. Ndërkohë, Barcelona udhëton në kryeqytet me shumë probleme. Kampionët kanë një listë të gjatë mungesash për shkak të lëndimeve dhe do të jenë pa trajnerin Hansi Flick, i cili u përjashtua me karton të kuq në ndeshjen e kaluar ndaj Gironas, sfidë që katalanasit e fituan me vështirësi në kohën shtesë.
Dy portierët Marc Andre Ter Stegen dhe Joan Garcia mungojnë, derisa mungesa të mëdha janë edhe Gavi, Dani Olmo, Raphinha dhe Robert Lewandowski.
Pavarësisht formës së mirë të përgjithshme, të dyja ekipet kanë pësuar humbje të rënda në këtë sezon. Reali u mposht nga rivali i qytetit, Atletico Madrid, me rezultatin 5:2, ndërsa Barcelona u deklasua nga Sevilla me shifrat 4:1. Në arenën evropiane, madrilenët kanë bilanc perfekt në Ligën e Kampionëve, ndërsa Barcelona ka regjistruar një humbje ndaj kampionit në fuqi të Evropës, PSG-së.
Reali kërkon hakmarrje për sezonin e kaluar
El Clasico i sotëm pritet të jetë një sfidë e ngarkuar emocionalisht për Realin, i cili kërkon hakmarrje pas poshtërimeve të sezonit të kaluar. Katër fitoret e Barcelonës ndaj madrilenëve në sezonin e shkuar janë ende të freskëta në kujtesë, veçanërisht disfata e rëndë 0:4 në “Bernabeu” dhe humbja 5:0 në finalen e Kupës së Mbretit në Arabinë Saudite.
Edhe pse Alonso ka qenë diplomatik në deklarata, dëshira për hakmarrje është e qartë brenda klubit madrilen. Tifozët presin që skuadra e tyre të japë një përgjigje të fortë në fushë.
Statistikat dhe tradita
Në historinë e përballjeve direkte, Real Madridi është më i suksesshëm me 105 fitore, ndërsa Barcelona ka 104. Nëse avantazhi i “Los Blancos” do të rritet apo barazohet, do të mësohet pas përfundimit të ndeshjes rreth orës 18:00.
Sfida e madhe e Spanjës, që tradicionalisht tejkalon kufijtë e futbollit, pritet të ofrojë spektakël të vërtetë në çdo sekondë.
Me fillimin e ndeshjes në ora 16:15, “Santiago Bernabeu” do të jetë skena ku do të shkruhet kapitulli i radhës i rivalitetit më të madh në historinë e futbollit. /Kampionet/
