Ish-mbrojtësi i Barcelonës, Gerard Pique, ka reaguar pas deklaratave të Lamine Yamal, i cili kishte ngjallur polemika me një batutë në drejtim të Real Madridit.
Gjatë një transmetimi në platformën e Kings League, Ibai Llanos – pronar i klubit Porsinos – e pyeti talentin e Barcelonës nëse Real Madridi vjedh, kurse përgjigja e spanjollit ishte e qartë: “Po, sigurisht. Ata mashtrojnë dhe ankohen”.
Me këtë deklaratë kanë mbetur të zemëruar lojtarët dhe klubi i Real Madridit, të cilët kërkojnë “revanshin” në “El Clasico”. Megjithatë, Pique e ka mbështetur Yamal duke deklaruar se është ende i ri dhe do të fitojë pervojë me kohën.
“Duhet ta pranojmë Lamin për atë që është. Ai do të fitojë përvojë me kohën. Askush në moshën 18-vjeçare nuk është i njëjtë si në 38. Lamine Yamal është një lojtar i veçantë”.
“Sa për kritikat nga Real Madridi? Është normale, do të donin edhe ata të kishin një Lamine të tyre”.
Të dielën, Real Madridi pret Barcelonën në “Santiago Bernabeu” në kuadër të javës së 10-të të La Ligës.
Kujtojmë, madrilenët kanë vendosur ta mbyllin edhe çatinë e “Santiago Bernabeut” për ta bërë sfidën edhe më të vështirë për lojtarët e Barcelonës./Kampionet/
