Alfonso Perez Munoz, lojtar i ekipit të parë të Real Madridit nga viti 1991 deri në 1995, u ul me Josep Pedrerol në emisionin e tij ‘El Cafelito’.
Emri i Vinicius Junior vazhdon të jetë njëri nga më të përfolurit në botën e futbollit, pasi e ardhmja e tij te Los Blancos vazhdon të mbetet e paqartë.
Raporti i tij me trajnerin Xabi Alonso dhe sjelljet e tij jo aq të mira për një klub si Real Madridi kanë bërë që zërat për një largim të tij të shtohen dita ditës.
I fundit që mendon se sulmuesi brazilian duhet të largohet nga “Santiago Bernabeu” është ish-lojtari i Real Madridit, Alfonso Perez Munoz.
“Nuk jam shumë i bindur nga Vinicius. Disa njerëz mund të më kritikojnë, por unë… do ta kisha shitur dhe do të kisha nënshkruar me një qendërsulmues. Mendoj se Real Madridit i duhet absolutisht një qendërsulmues”, rrëfeu fillimisht ish-lojtari i Real Madridit, Betisit, Barcelonës dhe Marseille.
“Nuk më pëlqen imazhi që Vinicius krijon në fushë. Nuk është mirë as për të, as për Real Madridin…”.
“Më vjen shumë keq, por do ta kisha shitur për të nënshkruar me qendërsulmuesin më të mirë në botë… i cili tani, për sa i përket golave, është Haaland”, theksoi ish-futbollisti 53-vjeçar. /Kampionet/
