Përzgjedhësi i Kombëtares së Kosovës U-21, Afrim Tovërlani ka publikuar listën e futbollistëve të ftuar për ndeshjet kualifikuese të muajit nëntor në kuadër të Euro 2027.
Dardanët U21 do të zhvillojnë dy ndeshjet e radhës për kualifikimet e Kampionatit Evropian kundër Qipros dhe kundër Finlandës.
Ndeshja e parë ndaj Qipros do të luhet në udhëtim më 14 nëntor, ndërsa ndeshja ndaj Finlandës do të luhet gjithashtu në udhëtim më 18 nëntor.
Për këto dy ndeshje të rëndësishme në kuadër të grupit A, Tovërlani ka vendosur t’i ftojë 24 futbollistë.
Një nga risitë e listës së Tovërlanit është mesfushori i ri i Prishtinës, Dren Zeqiri, teksa nuk mungojnë edhe emra tjerë që luajnë në Superligën e Kosovës.
Altin Gjokaj, Luan Lleshi, Dardan Morina, Arianit Hasani, Erion Sadriu, Elvir Gashijani dhe Igball Jashari janë disa nga ta.
Në listë nuk mungojnë as yje tjerë që luajnë në Evropë si Eliot Bujupi, Leon Frokaj, Arjanit Fazlija dhe Idrit Mavraj. /Kampionet/
