Barcelona i ka fituar të katër përballjet e fundit ndaj Real Madridit dhe do të shpresojë ta vazhdojë atë formë edhe në El Clasicon e fundjavës, që do të zhvillohet në ‘Santiago Bernabeu’.
Skuadra e Hansi Flick nuk do të jetë në përbërje të plotë për këtë ndeshje, por edhe në këto kushte, trajneri gjerman do të ketë disa dilema për formacionin titullar.
Mungesa e Joan Garcias do të thotë se Wojciech Szczesny, i cili ende nuk ka arritur të mbajë portën e paprekur që nga rikthimi në formacion, do të vazhdojë të jetë titullar në portë. Megjithatë, përpara tij mbetet pasiguri të paktën për një nga pozicionet në mbrojtje.
Në dy ndeshjet e fundit, Barcelona ka luajtur me një katërshe të përbërë nga Jules Kounde, Eric Garcia, Pau Cubarsí dhe Alejandro Balde. Kjo ka bërë që Ronald Araujo të ndihet i zhgënjyer në stol, por sipas Marca, ka shumë gjasa që ai ta nisë ndeshjen si titullar kundër Real Madridit.
Hansi Flick
Shpejtësia e rikuperimit të Araujos do të jetë thelbësore në mbrojtjen e lartë përballë lojtarëve si Vinicius Junior dhe Kylian Mbappé, ndaj prania e tij në fushë do të kishte kuptim.
Nëse ai luan, mbetet për t’u parë kë do të zëvendësojë, më e mundshme është që gara të jetë mes Kounde dhe Eric Garcia, nëse largohet i pari, atëherë i dyti do të zhvendoset në krahun e djathtë të mbrojtjes, ku ka luajtur në javët e para të sezonit.
Në mesfushë, pritet që Frenkie De Jong dhe Pedri të formojnë dyshe, me kusht që holandezi të rikuperohet plotësisht nga problemi shëndetësor i ditëve të fundit.
Në sulm, është e sigurt se Lamine Yamal, Fermin Lopez dhe Marcus Rashford do ta nisin nga minuta e parë, ndërsa mbetet për t’u vendosur se kush do t’u bashkohet atyre, zgjedhja është mes Raphinhas dhe Ferran Torresit./Kampionet/
