Presidenti i Barcelonës, Joan Laporta, e mirëpriti vizitën e Lionel Messit në “Camp Nou” të dielën në mbrëmje, duke e cilësuar si një “akt të spontanizuar barcelonizmi”, por disa anëtarë të bordit të tij dyshojnë se pas kësaj mund të fshihet diçka më shumë.
Të hënën në mëngjes, Messi publikoi në rrjetet sociale foto nga fusha e “Camp Nou”, të cilën e kishte vizituar pa njoftuar më parë klubin.
Ai u duk i lumtur që u rikthye për herë të parë në stadiumin që e kishte lënë mes lotësh në vitin 2021, pa pasur kurrë mundësinë të përshëndetej me tifozët në fushë.
Më vonë, në një intervistë të regjistruar përpara vizitës, Messi deklaroi se ai dhe familja e tij e ndiejnë mungesën e jetës në qytet, por Laporta ka përjashtuar rikthimin e 38-vjeçarit si lojtar.
Ndërsa Laporta deklaroi të mërkurën se nuk po mendonte për zgjedhjet, Radio Catalunya raporton se disa anëtarë të bordit të tij besojnë se disa prej rivalëve politikë të presidentit mund të kenë qenë të përfshirë në këtë vizitë të Messit.
Lionel Messi
Ekziston dyshimi se një ose më shumë nga grupet opozitare mund të kenë luajtur rol në këtë ngjarje, me emrin e Victor Font që përmendet mes tyre.
Zgjedhjet e ardhshme në Barcelonë mund të mbahen pas rreth pesë muajsh, dhe së fundmi është përfolur se disa nga grupet opozitare mund të kërkojnë mbështetjen e Messit gjatë procesit elektoral, mbështetje që mund të ndikojë ndjeshëm në rezultatin përfundimtar.
Familja Messi thuhet se ende ndien pakënaqësi ndaj Laportës për mënyrën se si ndodhi largimi nga Barcelona, ndërkohë që Laporta fitoi zgjedhjet kundër Fontit duke premtuar se do ta mbante Messin në klub./Kampionet/
